Яккабоғ тумани ҳокими ўринбосарини устига бензин сепиб, уни ёқиб юборган тадбиркор Баҳриддин Исомов қайта суд-психология экспертизаси хулосасидан сўнг 29 август куни қамоқдан озод этилди. Бу ҳақда тадбиркорнинг адвокати Музаффар Обидовга асосланиб, «AdvokatNews.uz» хабар бермоқда. Тадбиркор судга ўз уйидан қатнайди.
Адвокатнинг сўзларига кўра, Қарши университети психология факультети олимларидан иборат экспертлар гуруҳи 24 август куни Баҳриддин Исомов тўғрисида «ўша хатти-ҳаракатни содир этган вақтида аффект ҳолатида бўлган» деб хулоса берган. Ушбу хулоса асосида, Яккабоғ тумани прокурори санкцияси билан айблов Жиноят кодексининг 97-моддаси (қасддан одам ўлдириш)дан 98-модда (кучли руҳий ҳаяжонланиш ҳолатида қасддан одам ўлдириш)га қайта малакаланиб, айблов енгиллашгани муносабати билан қамоққа олиш эҳтиёт чораси бекор қилинган.
Мавзуга доир: Яккабоғ тумани ҳокими ўринбосарини ёқиб юборган тадбиркорнинг ўғли: «Бизга мурувват керак эмас, дадам қамоқдан чиқса бўлди...»
Адвокат Музаффар Обидовнинг сўзларига кўра, ушбу экспертиза масалага юзаки ва бир томонлама қараб, айбланувчининг руҳий аҳволини ҳисобга олмаган. «Психолог мутахассислар ҳимоямдаги шахс билан ҳатто бирор марта суҳбатлашмаган ҳам. Унинг айбланишига сабаб бўлган хатти-ҳаракатнинг содир этилишидаги вазият, мотивлар пухта ўрганилмаган. Шунчаки, тергов материаллари нари-бери варақланиб, ‘бу одам ўз хатти-ҳаракатларига жавоб бера олади’, деган мазмунда хулоса тайёрлашган», — дейди адвокат.
Бундан хабар топган адвокат вилоят прокурорига илтимоснома ёзиб, ҳимояси остидаги шахсга қайта экспертиза тайинланишига эришган. Бу сафар Қарши университети психолог олимларидан ташкил топган экспертлар Исомовнинг руҳиятини ва тергов материалларини синчиклаб ўрганиб чиққач, жамиятда катта резонанс келтириб чиқарган «Яккабоғ воқеаси» асосий иштирокчиларидан бўлган маҳаллий тадбиркорнинг ўша вақтда аффект, яъни кучли руҳий ҳаяжонда бўлганини тасдиқлаган.
Иш қайта малакаланиши билан бирга тергов тугатилиб, материаллар судга тақдим қилинган. «Суд жамиятнинг воқеага нисбатан реакциясини ҳисобга олиб, енгилроқ жазо тайинлайди, деб умид қиламан. Қолаверса, ўша машҳур ‘снос’ можароларига ҳукумат ва Президент қандай муносабат билдирганини, кейин қандай ўзгаришлар бўлганини яхши биласиз. Бу ёғини кўрамиз», — дея адвокат Обидовнинг сўзларидан иқтибос келтирмоқда «AdvokatNews.uz».
Эслатиб ўтамиз, Жиноят кодексининг 98-моддасида кучли руҳий ҳаяжонланиш ҳолатида қасддан одам ўлдирганлик учун 2 йилдан беш йилгача озодликни чеклаш ёхуд 5 йилгача озодликдан маҳрум қилиш жазоси кўзда тутилган.
Изоҳ (0)