МДҲ давлатларидаги ОТМлар томонидан масофадан туриб ёки сиртқи таълим турлари бўйича ўқишга таклиф қилиниб, тарғибот-ташвиқот ишлари амалга оширилмоқда. Уларда ўқишга қизиқиш билдирган ўзбекистонлик абитуриентлар ва уларнинг ота-оналари ушбу таълим муассасалари дипломлари мамлакатда тан олиниши бўйича саволлар билан мурожаат қилмоқда.
Вазирлар Маҳкамаси ҳузуридаги Таълим сифатини назорат қилиш инспекциясига кўра, айни пайтда Ўзбекистонда олий таълим, кундузги, кечки ва сиртқи шаклда олиб борилади. Амалдаги қонунчиликда олий таълим олиш учун масофавий таълим шакли назарда тутилмаган.
Вазирлар Маҳкамасининг 2019 йил 24 июлдаги 620-сонли қарори билан билан тасдиқланган Хорижий давлатларда таълим олганлик тўғрисидаги ҳужжатларни тан олиш тартиби ҳақида Низомнинг 5-боб 36-бандида хорижий таълим тўғрисидаги ҳужжатларни тан олиш рад этиладиган ҳолатлар кўрсатиб ўтилган.
Хусусан, мазкур бандда маълумот Ўзбекистон қонунчилигида назарда тутилмаган таълим шаклида олинган бўлса, рад этишга асос бўлиши белгиланган. Юқоридагиларга асосан хорижий ОТМларда масофадан туриб ўқигани учун берилган дипломлар Ўзбекистонда тан олинмайди.
Бундан ташқари, бир қатор хорижий олий таълим муассасалари томонидан бакалавриат учун уч йил ёки ундан кам муддатга сиртқи таълим шакли бўйича ўқишга таклиф этилмоқда.
Вазирлар Маҳкамасининг 2017 йил 21 ноябрдаги 930-сонли қарори билан Ўзбекистонда сиртқи таълимда ўқиш муддати 5 йил этиб белгиланган бўлиб, юқоридаги низомнинг 5-боб 36-бандида хорижий давлатларда касбий маълумот тўғрисида ҳужжат берадиган таълимнинг умумий меъёрий даври (тўлиқ умумий ўрта ёки ўрта маълумот олингандан кейин) Ўзбекистон таълим стандартларида назарда тутилган даврдан икки йилдан кам бўлса ҳужжатларни тан олиш рад этилиши белгиланган.
Шу тариқа, хорижий ОТМларнинг бакалавриат йўналиши бўйича сиртқи таълим шаклида 3 йил ёки ундан кам муддатда ўқиб олинган дипломлари Ўзбекистонда тан олинмайди.
Изоҳ (0)