Қарши шаҳридаги «Ватанпарварлар» боғида Ўзбекистон мустақиллигининг 28 йиллигига бағишланган «Аждодларга муносиб ворис бўлайлик» номли ёшлар фестивали бўлиб ўтди. Бу ҳақда Мудофаа вазирлиги Ахборот ва оммавий коммуникациялар департаменти «Дарё»га маълум қилди.
Унда мудофаа вазирининг тарбиявий ва мафкуравий ишлари бўйича ўринбосари генерал майор Азизбек Икрамов, Қашқадарё вилоят ҳокимлиги ва Ўзбекистон ёшлар иттифоқи марказий кенгаши вакиллари сўзга чиқиб, йиғилганларни байрам билан муборакбод этди.
Тадбир аввалида Ўзбекистон мудофаа вазирининг буйруғига асосан Мудофаа вазирлиги қўшинларида виждонан ва сидқидилдан хизмат қилган Жануби-ғарбий махсус ҳарбий округнинг бир гуруҳ ҳарбий хизматчилари ва нафақадаги ҳарбийлар «Мудофаа вазирлиги фахрийси» кўкрак нишони билан тақдирланди.
Шунингдек, Мудофаа вазирлиги фахрийлари ўртасида ўтказилган спорт мусобақаларида фахрли 2-ўринни эгаллаган Жануби-ғарбий махсус ҳарбий округ фахрийларининг мини футбол жамоасига фахрий ёрлиқ ва эсдалик совғалари топширилди.Тадбир давомида Жануби-ғарбий махсус ҳарбий округнинг ҳарбий хизматчилари томонидан жанговар чиқиш намойиш этилди. Фестиваль якунида концерт дастурига уланиб кетди.
Шунингдек, байрам муносабати билан Пачкамар гарнизонида жойлашган ҳарбий қисмда ҳарбийлар оилалари учун 20 иш ўрнига эга янги тикув цехи иш бошлади.
Изоҳ (0)