Давлат алкогол, ликёр-ароқ ва вино маҳсулотлари тармоғидан чиқмоқда, эндиликда у фақатгина бозорда регулятор вазифасини бажаради. Мазкур ўзгаришлар иқтисодиётни либераллаштириш ва давлат иштирокини қисқартириш доирасида амалга оширилмоқда, деб хабар бермоқда Spot.
Шу сабабли «Ўзшаробсаноат» тизимига кирувчи компаниялардаги давлат улушини сотишга тўғри келмоқда. Ҳозирда давлатда 140 дан ортиқ компаниянинг улуши мавжуд, хусусан, улар орасида улгуржи базалар (82 та компания) ҳам бор.
Давлат активларини бошқариш агентлиги акциялар пакетини сотувга қўйишни бошлаган. Айни вақтда e-аукцион.uz сайтига мамлакатнинг турли жойларидан 60 дан ортиқ лотлар кимошди савдосига қўйилган.
Бошланғич нархлар компанияларга боғлиқ — лотлар остида уларнинг қарзи бор ёки йўқлиги, молиявий кўрсаткичлари кўрсатилган.
Масалан, Тошкентдаги Faiz Sharob Savdo компаниясининг 100 фоиз улуши 336 миллион сўм турса, Chilonzor Tumani Sharob Savdo компанияси 1,5 миллиард сўмга баҳоланган. Биринчисининг дебиторлик қарзи 5 миллиард сўмдан ортиқ, иккинчисиники эса — 2,2 миллион сўм.
Кимошди савдоларида қатнашиш тартиби худди бошқаларники каби — рўйхатдан ўтиш, бошланғич қийматнинг 5 фоизини олдидан тўлаш ва бошқалардан кўра юқорироқ нархни таклиф этиш керак.
Изоҳ (0)