30 август куни Поп—Наманган электрлаштирилган темир йўли орқали тезюрар йўловчи поездининг илк қатнови амалга оширилди. Бу ҳақда «Дарё» мухбири Азизбек Абдувалиев хабар бермоқда.
Олдинлари темир йўл орқали Намангандан Тошкентга боришни истаганлар вилоят марказидан анча олисда жойлашган Поп туманига қатнаши ёки аксинча, пойтахтдан поездга ўтирган йўловчи Попда, охирги бекатда тушиб қолиб, яна машинада манзилига кетишига тўғри келарди. Энди бунга ҳожат қолмади.
Йўлнинг мазкур қисми Поп, Чуст, Тўрақўрғон, Ровустон ва Наманган бекатларини ўз ичига олади ва умумий узунлиги 45 километрдан иборат. Ушбу масофада жами 690 та таянч устуни, 690 та консол ўрнатилди, контакт симлари тортилди.
«Ўзбекистон темир йўллари» АЖ мутасаддиларига кўра, темир йўл тармоғининг мазкур қисмида тепловозлар замонавий электровозларга алмаштирилиши ҳаракат тезлигини ошириш ҳамда юк ва йўловчи ташиш харажатларини камайтириш имконини беради. Жумладан, тепловозлар ёқилғи сарфи билан солиштирганда харажатлар 3 баробарга қисқаради.
Электрлаштирилган темир йўлнинг фойдаланишга топшириш маросимида Наманган вилояти ҳокими Хайрулло Бозоров, «Ўзбекистон темир йўллари» АЖ бошқаруви раисининг ўринбосари Акмал Камолов иштирок этди.
Маросим иштирокчилари Наманган темир йўл вокзалида ходимлар, йўловчи ва уларни кузатувчилар учун яратилган шароитлар билан танишди.
Маълумот учун, «Поп – Наманган – Андижон темир йўл линиясини электрлаштириш» лойиҳасининг умумий қиймати 202,3 миллион доллар бўлиб, бундан 80 миллиони Осиё тараққиёт банки маблағи ҳисобига тўғри келади.
Изоҳ (0)