Тасаввур қилинг, талаба ёки новаторсиз, автомобилсозлик, автосаноат, умуман, айни соҳага алоқадор бир қанча ғояларингиз бор-у, уларни амалга оширишга йўл, ўзингиз учун муносиб ҳамкор излаб юрибсиз. Чет элда таълим олаётган тенгдошларингиз билан фикр-мулоҳаза, тажриба алмашиш истаги ҳам йўқ эмас. Қаерга борасиз, кимга мурожаат қиласиз? Энди бу саволнинг жавоби аниқ.
Тошкентнинг Бектемир туманида очилган Ўзбекистондаги илк инновацион стартап-платформа — UzAuto Market сизга шундай имкониятни тақдим этади. Талабалар, новаторлар, ихтирочилар, ишлаб чиқарувчилар, импортчилар, савдо-сотиқ соҳасининг вакиллари, сармоядорлар – соҳага чамбарчас боғлиқ мутахассислар учун ягона майдон.
Хўш, бундай платформанинг ташкил этилишига қандай омиллар асос бўлиб хизмат қилди? Очилиш маросимида сўзга чиққан «Ўзавтосаноат» раиси Шавкат Умрзоқов томонидан келтириб ўтилган:
- Хорижда ёки ўзимизда таълим олаётган, ишлаётган ёшларнинг кейинги фаолиятини қўллаб-қувватлаш;
- Тайёр ғояларга эга ёшлар ва уларни амалга ошириш имкониятига эга ишлаб чиқарувчилар, сармоядорларни бирлаштириш;
- Ёшларнинг ғояларини рўёбга чиқариш, сотиш, керакли маҳсулотлар устида илмий ишларини олиб боришига шароит ҳозирлаш;
- Соҳага алоқадор мутахассисларни тизим имкониятлари билан изчил таништириш;
- Яратилган ғояларнинг четга чиқиб кетмасдан Ўзбекистонда татбиқ этилишини таъминлаш мақсадлари асносида бугунги кунда ана шундай янги платформага қўл урилди.
UzAuto Market Show-room'ида ўзимизнинг талабалар томонидан қилинган ишларни кўрасиз, йигитларимиз шу нарсаларни қила оладими, деб ёқимли тарзда ҳайрон қоласиз. Айни стартап-платформа орқали биз уларнинг имкониятларини халқимиз, ишлаб чиқарувчларимизга етказиб берамиз. Платформа ишлайдиган, инсон келганида ичидаги ғояларини айта оладиган, бизнес ярата оламан, пул топа оламан, деб ўйлайдиган, ғоялари рўёбга чиқадиган жой деб билиши керак. Бу ерда автосаноатнинг 30 та заводи бирлашади, дейлик, бир четда стартап устида ишлайдиган йигитлар, уларнинг ёнига эса импортчи, маҳсулот етказиб берувчилар, сармоядорларни жамлаймиз. Айни вақтнинг ўзида Англия, Япония, Корея, Италия ва бошқа давлатлардаги 30 дан ортиқ ёшлар мазкур платформада бирикиб бўлди. Асосийси, ана шу амалга ошираётган лойиҳамиз якуний босқичида шак-шубҳасиз, харидорлар ютади.Шавкат Умрзоқов, «Ўзавтосаноат» раиси
Мухтасар қилиб айтганда, янги ташкил этилган ушбу стартап майдончада ёшларга ғоядан бизнесгача бўлган босқичда ишланмалар яратиш, ишлаб чиқариш тармоғи базасида рўёбга чиқариш, якунда тадбиркорларга бизнес учун ноёб маҳсулотлар етказиб беришда кўмак берилади.
Бироқ бу ҳали ҳаммаси эмас, платформада автомобиль эгалари ўз «тойчоқлари»нинг индивидуал кўринишига эришиши учун тюнинг ателье хизмат кўрсатса, енгил автомобиллар, катта юк ташиш техникасининг барча моделлар қатори, улар учун асл завод ҳолатидаги ҳамёнбоп нархлардаги эҳтиёт қисмлар (тез орада онлайн тарзида ҳам) сотувда бўлади. Энг эътиборга молик жиҳати, фақат шу ерда харидорлар автомобиль учун муддатсиз кафолат олишлари мумкин.
Стартап ғоялар рўёби, инжиниринг, тюнинг, автомобилларингиз учун асл эҳтиёт қисмлар – буларнинг барчасини битта майдонда, ягона платформада топасиз. Бектемирга марҳамат!
UzAuto Market душанбадан жумагача соат 09:00 дан 18:00 гача, шанба куни эса 10:00 дан 15:00 гача хизматингизда бўлади.
Манзил: Тошкент шаҳри, Бектемир тумани, Ҳ.Бойқаро кўчаси, 28а.
Изоҳ (0)