Малайзия солиқ органлари собиқ бош вазир Нажиб Разакнинг қизини тахминан 10,3 миллион ринггит (2,4 миллион доллар) миқдоридаги солиқларни тўлашдан бўйин товлаганликда айбламоқда. Бу ҳақда «ТАСС» хабар берди.
Хабарда айтилишича, июль ойи охирида Ички даромадлар бошқармаси 2011—2017 йиллар давомида даромадларини яшириш орқали солиқларни тўлашдан бўйин товлаганликда айбланаётган 31 ёшли Нуриана Нажибни судга берган. Бу иш бўйича биринчи суд мажлиси 12 сентябрь куни ўтказилиши режалаштирилган.
Ҳозирда Нуриана Нажиб Қозоғистоннинг биринчи президенти Нурсултон Назарбоевнинг жияни бўлмиш турмуш ўртоғи Данияр Назарбоев билан Малайзияда истиқомат қилмоқда.
Ўтган йилнинг май ойида парламент сайловларида мағлуб бўлганлиги сабаб собиқ бош вазирнинг оила аъзоларига ҳукумат раҳбари лавозимидан истеъфога чиққандан кейин мамлакатдан чиқиб кетиш тақиқланган эди.
Нажиб Разакка нисбатан пулларни ўзлаштириш, пора олиш, хизмат мавқейини суиистеъмол қилиш бўйича жиноий иш қўзғатилган. Ҳуқуқ-тартибот органларининг фикрича, ҳукуматнинг собиқ раҳбари 680 миллион доллардан ортиқ пулларни ўғирлаган. Бундан ташқари, у 1,5 миллиард доллар миқдоридаги солиқларни тўламаганликда айбланмоқда.
Изоҳ (0)