Malayziya soliq organlari sobiq bosh vazir Najib Razakning qizini taxminan 10,3 million ringgit (2,4 million dollar) miqdoridagi soliqlarni to‘lashdan bo‘yin tovlaganlikda ayblamoqda. Bu haqda “TASS” xabar berdi.
Xabarda aytilishicha, iyul oyi oxirida Ichki daromadlar boshqarmasi 2011—2017-yillar davomida daromadlarini yashirish orqali soliqlarni to‘lashdan bo‘yin tovlaganlikda ayblanayotgan 31 yoshli Nuriana Najibni sudga bergan. Bu ish bo‘yicha birinchi sud majlisi 12-sentabr kuni o‘tkazilishi rejalashtirilgan.
Hozirda Nuriana Najib Qozog‘istonning birinchi prezidenti Nursulton Nazarboyevning jiyani bo‘lmish turmush o‘rtog‘i Daniyar Nazarboyev bilan Malayziyada istiqomat qilmoqda.
O‘tgan yilning may oyida parlament saylovlarida mag‘lub bo‘lganligi sabab sobiq bosh vazirning oila a’zolariga hukumat rahbari lavozimidan iste’foga chiqqandan keyin mamlakatdan chiqib ketish taqiqlangan edi.
Najib Razakka nisbatan pullarni o‘zlashtirish, pora olish, xizmat mavqeyini suiiste’mol qilish bo‘yicha jinoiy ish qo‘zg‘atilgan. Huquq-tartibot organlarining fikricha, hukumatning sobiq rahbari 680 million dollardan ortiq pullarni o‘g‘irlagan. Bundan tashqari, u 1,5 milliard dollar miqdoridagi soliqlarni to‘lamaganlikda ayblanmoqda.
Izoh (0)