Ҳар йили куз–қиш мавсуми яқинлашганида аҳоли ва ижтимоий-иқтисодий тармоқларда электр таъминотидаги узилишлар билан боғлиқ муаммолар юзага келишига кўникиб қолганмиз. Лекин ёз ойларида ҳам Фарғона вилоятининг барча туманларида электр энергияси таъминотида кўп соатли узилишлар кузатилмоқда. «Дарё» мухбирига сўнгги кунларда келаётган мурожаатларнинг асосий қисми ҳам электр таъминотидаги муаммолар бўйича.
— Бир ойдан бери «свет» жуда кўп ўчадиган бўлиб қолди. Бир–икки соат ёнади, кейин яна ўчади. Куннинг қайси вақтида ўчиб, қачон ёнишини аниқ билмаймиз. Қиш кунларида электр таъминотида узилишлар кўп бўлишини тушуниш мумкин, ҳаво ҳарорати пасаяди, электрга талаб кучаяди. Лекин ёзда-чи?
«Ҳар бир оила – тадбиркор» дастури бўйича имтиёзли кредит олиб, тикувчилик цехи очганман. Энди ишни йўлга қўйганимизда, бу муаммо чиқиб турибди. Икки–уч соатлаб электр берилмаяпти. Айни керак пайтда ўчиришади. Шунинг учун ишимизда узилишлар кўп бўляпти. Буюртмачиларга маҳсулотларни ўз вақтида етказиб бера олмаяпмиз. Ишни тўхтатсак, банкдан олинган кредитни қандай қайтараман? Қишлоқда менга ўхшаган тадбиркорлар кўп. Ҳамманинг хаёлида шу муаммо. Бизда умуман газ йўқ. Аҳоли ва тадбиркорлар учун ҳеч бўлмаса электрни узлуксиз етказиб бериш керакку, — дейди Фарғона вилояти Бувайда тумани Олтинқўрғон қишлоғидан Муҳаммадсаид Ҳайдаров.
— Ўтган йили электр таъминотида узилишлар кам бўлган эди. Бу йил ёз ойларида ҳам электр ҳолати яхшиланмади. Хоҳлаган вақтда ўчиришади. Тартиб йўқ, огоҳлантириш йўқ. Шуни жадвал билан, аҳолини олдиндан огоҳлантириб, кейин ўчиришса бўлмайдими? Биз ҳам ишимизни шунга қараб режалаштирар эдик. Электр энергиясини текинга олаётганимиз йўқ-ку. Тўловини олдиндан қиляпмиз. Мана, яна нархлар ошди, лекин электр таъминоти яхши томонга ўзгаргани йўқ. Электр корхонасига телефон қилсангиз, лимит тугагани учун юқоридан узилди, ёқилғи етишмаяпти, деган жавобларни эшитасиз.
Тадбиркорман, хусусий дўконимда озиқ-овқат маҳсулотлари билан савдо қиламан. Мана ҳозир ҳам «свет» йўқ. Дўкондаги электрон тарози, музлатгич, кондиционер ишламаяпти. Музқаймоқлар эриб кетган, сувлар совишга улгурмаяпти. Бу кетишда банкрот бўламан-ку, — дейди Фарғона вилояти Бағдод тумани Қоракўл қишлоғидан Жасур Имомов.
— Қишда майли эди. Трансформаторлар юкланишни кўтара олмасди. Ёзда энди бу нимаси? Қачонгача халқ қишин-ёзин қийналади. Биз бечораларни эшитадиганлар борми? Қачонгача Фарғона вилояти халқи, Учкўприк тумани халқи қийналади? Нега «свет» ўчди, деб савол бермоқчи бўлсак, туман электр тармоқлари корхонасининг телефони доим банд. Ҳали овқатланганимиз йўқ, укол олишга улгурмадик, болаларни ювинтириш ҳақида-ку, гапирмаса ҳам бўлади! Биз қишлоқликлар одам эмасми? Биз солиқ тўламаяпмизми, биз электр ҳақидан қарздормизми? — дейди Фарғона вилояти Учкўприк тумани Учкўприк қишлоғида яшовчи Шарифахон Мадраҳимова.
— Эрталаб 7:00 дан ўчишни бошлайди. Бир соатдан кейин ёнади, икки–уч соатда яна ўчади. Бу ҳолат бир суткада 5–6 марта такрорланяпти. Аҳолига, айниқса, ёш болали оилаларга қийин бўляпти. Кейинги кунларда эрталаб ҳамма ишга кетадиган пайтда ва айни кечки овқат маҳалида ўчиришни одат қилиб олишди, — дейди Фарғона вилояти Данғара тумани Тул қишлоғидан Гулноза Эргашева.
Электр таъминотида нима сабабдан кўп соатли узилишлар кузатилмоқда ва бу ҳолат қачон бартараф этилади? Шу савол билан вилоят ҳудудий электр тармоқлари корхонаси мутасаддиларига мурожаат қилдик.
— Вилоят ҳудудий электр тармоқлари корхонасининг вазифаси, берилаётган маълум миқдордаги электр энергиясини тақсимлашдан иборат. Вилоятимизда истеъмолчиларга бир суткада узилишларсиз электр энергияси етказиб бериш учун 14–14,5 миллион кВт-соат миқдорида энергия зарур. Айни пайтда бизга чеклов ҳисобига 13–13,5 миллион кВт-соат электр энергияси бериляпти. Бир суткада 1–1,5 миллион кВт-соат электр энергияси етишмовчилиги юзага келяпти. Натижада жойларда электр таъминотида узилишлар кузатиляпти. Бунга электр энергияси ишлаб чиқарувчи ИЭСлардаги ёқилғи етишмовчилиги билан боғлиқ муаммолар сабаб бўлмоқда. Вилоятнинг электр тармоқларида носозлик ва авария ҳолатлари йўқ.
Шуни алоҳида таъкидлаш керак, йилдан йилга аҳоли ва ишлаб чиқариш объектлари кўпайиб, истеъмолчилар сони ортяпти. Мисол учун, ўтган йили шу кунларда вилоятимизда 13 миллион кВт-соат электр энергияси истеъмол қилинган бўлса, бугунги кунда талаб 14 миллион кВт-соатдан ортиб кетди.
Шундай бўлса-да, муҳим иқтисодий корхоналарни узлуксиз электр энергияси билан таъминлаяпмиз. Ижтимоий соҳа объектларини ҳам ўчирмасликка ҳаракат қиляпмиз, — дейди Фарғона вилояти ҳудудий электр тармоқлари корхонаси раҳбари ўринбосари Абдураҳим Маматқулов.
Электр таъминотидаги узилишлар аҳолининг кундалик турмушига ва ижтимоий-иқтисодий соҳаларга салбий таъсир ўтказади. Қишлоқ жойлардаги кўплаб тадбиркорлар электр танқислиги туфайли зарар кўраётгани, ҳатто айримлари фаолиятини тўхтатишга мажбур бўлаётгани ҳам бор гап. Қолаверса, мутасаддилар узилишлар бўйича белгиланган жадвал бор, дегани билан унга ҳеч ким амал қилмаяпти. Ток исталган вақтда ўчириляпти. Бу ҳолат аҳолининг ҳақли эътирозларига сабаб бўляпти. Вилоятга ажратиладиган лимитни ошириш ёки уни умуман бекор қилиш мумкин эмасми? Электр таъминотидаги узилишларни белгиланган жадвал асосида истеъмолчиларни олдиндан хабардор қилган ҳолда амалга оширишнинг имкони йўқми?
Ўйлаймизки, ҳудудий электр тармоқлари ташкилотлари бу муаммога жиддий эътибор қаратади ва тез кунларда электр таъминотидаги кўп соатли узилишлар бартараф этилади.
Изоҳ (0)