- Неймар (ПСЖ). Қизиқаётган клублар: «Барселона», «Реал», «Ювентус»
Ёзнинг энг қайноқ трансфер «сериал»и яна Неймарга тегишли. Футболчи бутун ёз давомида ПСЖда бахтсиз эканлигини таъкидлаб келмоқда. Неймар Париж клубига ўтиб, хато қилганини ҳам тан олди. Парижликлар эса футболчи учун сарфланган 222 миллион еврони ортга қайтаришни истамоқда. Ортда қолган мавсумларда кўплаб жароҳатларга йўлиққан Неймар учун бунча маблағ тўлашни эса на «Барселона» ва на «Реал» истамоқда. Сўнгги вақтларда эса Неймарнинг хизматларига «Ювентус» ҳам қизиқиб қолгани ҳақида хабарлар пайдо бўлди. Ҳатто Неймарнинг ўзи Криштиану Роналду билан ўйнашга тайёрлиги ҳақида бонг урилмоқда.
Неймарнинг ПСЖ сафидаги статистикаси
Ўйинлар: 58 та
Голлар: 51 та
Совринлар: 5 та- Пауло Дибала («Ювентус»). Қизиқаётган клуб: ПСЖ
Англияда трансфер ойнаси ёпилгунга қадар Пауло Дибаланинг «Манчестер Юнайтед»га ўтиши овоза қилинди. Бироқ у на «Юнайтед»га ва «Тоттенҳэм»га ўтди. Дибала ҳамон Туринда. Сўнгги кунларда эса Неймарнинг ПСЖдан кетиши ҳақидаги гап-сўзлар ортидан аргентиналикнинг хизматларига Париж клуби жиддий қизиқаётганлиги ошкор этилмоқда. Маълум қилинишича, ПСЖ Дибаланинг ўзига йиллик 11 миллион фунт маош беришга тайёр. «Ювентус» бу трансферни ўйлаб кўриши кутилмоқда.
Пауло Дибаланинг «Ювентус»даги статистикаси
Ўйинлар: 182 та
Голлар: 78 та
Совринлар: 9 та- Мауро Икарди («Интер»). Қизиқаётган клублар: «Наполи» ва «Ювентус»
Антони Конте «Интер» бошқарувига келгач, Мауро Икарди унинг режаларида йўқлигини маълум қилди. Икардининг «Интер» раҳбарияти билан муаммолари эса ўтган мавсум аввалидаёқ бошланганди. Конте Ромелу Лукакуни жамоага жалб эта олди. Миланликлар эса ҳамон Икарди борасида «ёғлироқ» таклифни кутмоқда. Аргентиналик футболчининг хизматларига «Ювентус» ҳамда «Наполи» қизиқиш билдирган. Мауронинг ўзи эса «Интер»ни фақат «Ювентус» деб тарк этишини, акс ҳолда клубда қолиб, ўйинга тушмаса ҳам яхшигина маошини олиб ётишга тайёрлигини маълум қилган.
Мауро Икардининг «Интер»даги статистикаси
Ўйинлар: 219 та
Голлар: 124 та
Совринлар: йўқ- Хамес Родригес («Реал»). Қизиқаётган клублар: «Атлетико» ва «Наполи»
«Бавария»даги икки йиллик ижарадан сўнг колумбиялик юлдуз «Реал»га қайтиб келди. Мюнхенликлар Хамесни сотиб олишга жазм этмади ва унинг ўрнига «Барселона»дан Филиппе Коутиньони ижарага олиш билан масалани ҳал этди. Хамеснинг хизматларига ёз бошланганидан бери «Наполи» ҳамда «Атлетико»нинг қизиқаётганлиги айтилмоқда. Карло Анчелотти Хамесни Неаполда кўришни хоҳлаётгани ҳақида таъкидланди. Аммо «Наполи» ПСВ Ирвинг Лосано трансферини амалга оширишни маъқул кўрмоқда. Бундан ташқари Диего Симеоне Хамесни «Атлетико»да кўришга қарши эмас. Бироз муддат аввал эса Зинедин Зидан Колумбия терма жамоаси вакилининг «Реал»да қолишига қарши эмаслиги маълум қилинди.
Хамес Родригеснинг «Реал»даги статистикаси
Ўйинлар: 111 та
Голлар: 36 та
Совринлар: 7 та- Кристиан Эриксен (Тоттенҳэм). Қизиқаётган клублар: «Реал» ва «Атлетико»
«Тоттенҳэм» янги мавсум олдидан Райан Сессеньон, Джовани Ло Чельсо, Тангуй Ндомбеле каби ўйинчилар билан таркибини кучайтириб олди, аммо Кристиан Эриксеннинг жамоадан кетиши «шпорлар» учун оғир зарба бўлади. Сўнгги вақтлар даниялик футболчи ўзини янги чемпионатда кўрсатишни хоҳлаётгани яшираётгани йўқ. Шу боисдан ҳам Эриксен Лондон клуби билан янги шартнома имзолашдан бош тортиб келмоқда. Унинг хизматлари билан эса Мадриднинг икки жамоаси — «Реал» ҳамда «Атлетико» жиддий қизиқиб қолган. «Тоттенҳэм» эса футболчини келаси мавсум бепул қўйиб юбормаслик учун унга ҳафталик 200 минг фунт маошдан иборат янги шартнома таклиф қилмоқда. Эриксен айни дамда лондонликлар сафида ҳафтасига 80 минг фунт маош олади. Ўйлаш кўриш учун сабаб бордек…
Кристиан Эриксеннинг «Тоттенҳэм»даги статистикаси
Ўйинлар: 277 та
Голлар: 66 та
Совринлар: йўқ
FootballHD материал асосида Асрор Абдунзаров тайёрлади.
Изоҳ (0)