13—15 август кунлари Ўзбекистоннинг Владивосток шаҳридаги Бош консулхонаси делегацияси Россиянинг Узоқшарқий федерал округи таркибига кирувчи Камчатка ўлкасига ташриф буюрди. Бу ҳақда ТИВ матбуот хизмати хабар берди.
Ташриф доирасида Камчатка ўлкаси вице-губернатори Александр Войтов, Петропавловск-Камчацк шаҳар округи раҳбари Виталий Иваненко, тадбиркорлар ва туроператорлар ҳамда турли тузилмалар раҳбарлари билан икки томонлама учрашувлар, Ўзбекистон билан ҳамкорлик ривожи салоҳияти тақдимоти ўтказилди.
Музокалар давомида савдо-иқтисодий, туризм, маданий-гуманитар ҳамда консуллик-ҳуқуқий соҳаларда ҳамкорликни фаоллаштириш масалалари муҳокама қилинди.
Томонлар Ўзбекистон фуқароларига оид муаммолар юзага келганда зудлик билан ҳал қилишга келишди. Таъкидланганидек, 2019 йилда мазкур ўлка ҳудудида 6375 нафар Ўзбекистон фуқароси расман рўйхатдан ўтган.
Россиялик ҳамкорлар Ўзбекистондан мева ва сабзавотларни тўғридан тўғри етказишиб бериш ҳамда Ўзбекистоннинг Ташқи меҳнат миграцияси масалалари агентлиги билан меҳнат ресурсларини жалб қилишда ҳамкорлик ўрнатишга қизиқиш билдирди.
«Ўзбекистон» ҳудудий жамоатчилик ташкилоти вакиллари билан бўлиб ўтган учрашувда ўзбек диаспораси ва Бош консулхона ўртасидаги ҳамкорлик масалалари кўриб чиқилди.
«Ватандошларимиз юртимизда юз бераётган кенг кўламли ўзгаришлар тўғрисида катта қизиқиш билан маълумот олди. Дипломатлар томонидан кўплаб саволларга ҳам жавоб берилди», — дейилади хабарда.
Камчатка ўлкасида хизмат сафари доирасида Бош консулхона томонидан сайёр консуллик қабули ҳам ташкиллаштирилди. Унда консуллик-ҳуқуқий ва маслаҳат ёрдам кўрсатилди. Шунингдек, Бош консулхонага бориш имкониятига эга бўлмаган фуқароларга ватанга қайтиш сертификати ва бошқа ҳужжатлар ўша жойда расмийлаштириб берилди.
Изоҳ (0)