Монополияга қарши курашиш қўмитасининг Тошкент вилояти ҳудудий бошқармасига ушбу манзилда истиқомат қилувчи фуқаро М.Ғанихўжаевадан икки йил мобайнида у яшаётган кўп қаватли уйнинг оқава тизими талаб даражасига жавоб бермаслиги ҳақида мурожаат келиб тушган.
Қўмита матбуот хизматининг маълум қилишича, мурожаатни ўрганиш мақсадида кўрсатилган манзилдаги кўп қаватли уйга келган мутахассислар аризада «талаб даражасига жавоб бермайди» деган сўзлар уларнинг кўз олдида намоён бўлган манзарага нисбатан жуда «юмшоқ» қўлланилганга гувоҳ бўлган.
Қайд этилишича, юзага келган вазият тўғрисида шу уйда яшовчи фуқаролар «Сувоқава» ДУКнинг Янгийўл бўлинмасига жуда кўп маротаба мурожаат қилган. Ўтган икки йил мобайнида «Сувоқава»га ушбу уйда яшовчи фуқаролардан жами 150 та ариза келиб тушган, лекин бўлинма томонидан аризада келтирилган ҳолатлар бўйича ҳеч қандай чоралар кўрилмаган, мурожаатлар жавобсиз қолдирилган.
Ҳудудий бошқарма мутахассислари томонидан фуқаро мурожаати жиддий ўрганиб чиқилган. Муаммони ўрганиш давомида кўп қаватли уйнинг яқинида кафе ишга тушган бўлиб, унинг раҳбари ўзбошимчалик билан кўп қаватли уйнинг оқава тизимига улангани аниқланган.
Бу ҳолат охирги икки йил мобайнида уйнинг оқава тизимга салбий таъсир кўрсатган. Ҳудудий бошқарма томонидан ўтказилган ўрганиш натижасида, хўжалик субъекти кўп қаватли уйнинг оқава тизимидан узилган ва аввал белгиланган жойга ўз ҳисобидан уланган.
Изоҳ (0)