Ўзбекистонда бугунги кунда 1 383 инвестор томонидан давлат активларига 2,8 триллион сўм ва 669,5 миллион АҚШ доллари миқдорида сармоя киритилиши ва натижада ҳудудларда 42 мингга яқин янги иш ўрни яратилиши кўзда тутилган. Бу ҳақда «Дарё»га Давлат активларини бошқариш агентлиги матбуот хизмати маълум қилди.
Агентлик томонидан ушбу инвестиция мажбуриятлари бажарилишининг доимий мониторинги йўлга қўйилган бўлиб, тадбиркорларни қийнаётган, ўйлантираётган масалалар, юзага келаётган муаммолар тизимли равишда ўрганилмоқда ва уларни ҳал этиш чоралари кўриляпти.
Жумладан, ҳудудий бошқармалар томонидан давлат активларини инвестиция киритиш шарти билан сотиб олган 1322 инвесторнинг ҳолати ўрганилди. Натижаларга кўра, уларнинг 63 тасида ўз ечимини кутаётган масалалар борлиги аниқланган.
Жумладан, Тошкент вилоятидаги 211 нафар тадбиркорнинг 18, Андижон вилоятидаги 180 инвесторнинг 5, Қашқадарё вилоятидаги 99 та тадбиркорлик субъектининг 8 тасида муаммоси бор. Уларнинг аксарияти шартнома иштирокчиси бўлган давлат органи ва маҳаллий ҳокимликлар вакилларига таъллуқли.
Аниқланган муаммолардан 53 таси агентлик ходимларининг тезкор сай’-ҳаракатлари билан ҳал этилган ва қолган 10 тасини ечиш бўйича тегишли чоралар кўрилмоқда.
Изоҳ (0)