Ўзбекистоннинг Қозон шаҳридаги (Россия) Бош консулхонаси маълумотига кўра, «Кошелевский посад» корхонасида ишлаётган чоғида «номаълум моддадан заҳарланиш» ташхиси билан касалхонага ётқизилган 69 Ўзбекистон фуқаросидан 48 нафари V.Д.Середавин номидаги Самара вилояти клиник шифохонасида ва 1-сон Толятти шаҳар клиник шифохонасида бўлиб турибди. Уларнинг аҳволи барқарор-оғир деб баҳоланмоқда. Бу ҳақда Ташқи ишлар вазирлиги хабар бермоқда.
Ўзбекистон фуқароси О.С. вафот этди ва ҳозирда Бош консулхона марҳум ўзбекистонликнинг жасадини ватанга юбориш билан боғлиқ консуллик-ҳуқуқий ва ташкилий масалаларни ҳал қилишда кўмак кўрсатмоқда.
20 нафар ўзбекистонликка касалхонадан жавоб берилди ва улар иш жойларига қайтди. Улар маҳаллий шифокорларнинг доимий кузатувида бўлиб турибди.
Ўзбекистон Соғлиқни сақлаш вазирлигининг масъул ходимларидан ташкил топган ишчи гуруҳ юзага келадиган масалаларни ҳал қилиш учун россиялик ҳамкасблари билан алоқа ўрнатди.
Бош консулхона вазиятни доимий назоратда ушлаб турибди.
Консуллик-ҳуқуқий департаменти марҳумнинг оила аъзолари ва яқинларига ҳамдардлик изҳор этади ҳамда Россиянинг Волга бўйи федерал округи (Бошқирдистон Республикаси, Криов вилояти, Марий Эл Республикаси, Мордовия Республикаси, Нижегород вилояти, Оренбург вилояти, Пенза вилояти, Перм ўлкаси, Самара вилояти, Саратов вилояти, Татаристон Республикаси, Удмуртия Республикаси, Улянов вилояти, Чувашия Республикаси) ҳудудида бўлиб турган Ўзбекистон фуқароларига улар зарурат туғилган ҳолатларда мамлакатнинг Қозон шаҳридаги Бош консулхонасига қуйидаги телефон рақами орқали мурожаат қилишлари мумкинлигини эслатиб ўтади: +7-967-772-66-00.
Изоҳ (0)