O‘zbekistonning Qozon shahridagi (Rossiya) Bosh konsulxonasi ma’lumotiga ko‘ra, “Koshelevskiy posad” korxonasida ishlayotgan chog‘ida “noma’lum moddadan zaharlanish” tashxisi bilan kasalxonaga yotqizilgan 69 O‘zbekiston fuqarosidan 48 nafari V.D.Seredavin nomidagi Samara viloyati klinik shifoxonasida va 1-son Tolyatti shahar klinik shifoxonasida bo‘lib turibdi. Ularning ahvoli barqaror-og‘ir deb baholanmoqda. Bu haqda Tashqi ishlar vazirligi xabar bermoqda.
O‘zbekiston fuqarosi O.S. vafot etdi va hozirda Bosh konsulxona marhum o‘zbekistonlikning jasadini vatanga yuborish bilan bog‘liq konsullik-huquqiy va tashkiliy masalalarni hal qilishda ko‘mak ko‘rsatmoqda.
20 nafar o‘zbekistonlikka kasalxonadan javob berildi va ular ish joylariga qaytdi. Ular mahalliy shifokorlarning doimiy kuzatuvida bo‘lib turibdi.
O‘zbekiston Sog‘liqni saqlash vazirligining mas’ul xodimlaridan tashkil topgan ishchi guruh yuzaga keladigan masalalarni hal qilish uchun rossiyalik hamkasblari bilan aloqa o‘rnatdi.
Bosh konsulxona vaziyatni doimiy nazoratda ushlab turibdi.
Konsullik-huquqiy departamenti marhumning oila a’zolari va yaqinlariga hamdardlik izhor etadi hamda Rossiyaning Volga bo‘yi federal okrugi (Boshqirdiston Respublikasi, Kriov viloyati, Mariy El Respublikasi, Mordoviya Respublikasi, Nijegorod viloyati, Orenburg viloyati, Penza viloyati, Perm o‘lkasi, Samara viloyati, Saratov viloyati, Tatariston Respublikasi, Udmurtiya Respublikasi, Ulyanov viloyati, Chuvashiya Respublikasi) hududida bo‘lib turgan O‘zbekiston fuqarolariga ular zarurat tug‘ilgan holatlarda mamlakatning Qozon shahridagi Bosh konsulxonasiga quyidagi telefon raqami orqali murojaat qilishlari mumkinligini eslatib o‘tadi: +7-967-772-66-00.
Izoh (0)