Sulsher Lempardga qarshi. “Manchester Yunayted”—“Chelsi” to‘qnashuvi haqida

Angliya Premyer ligasi muxlislarni yangi mavsum starti bilan xursand qilibgina qolmay, balki ilk turdanoq ikki grand jamoani “Old Trafford” uchrashtirib, futbol ahliga katta spektaklni hadya etmoqda. Quyida ushbu uchrashuvga oid qiziqarli ma’lumotlarni birgalikda tanishib chiqishni tavsiya qilamiz.

“Chelsi”

Yozgi transferlar vaqtida Londonning “Chelsi” klubi ko‘plab o‘zgarishlarni boshdan o‘tkazdi. Jamoani ilk mavsum Yevropa Ligasi g‘olibligiga boshlab borgan Mauritsio Sarri ko‘ch-ko‘ronini ko‘tarib, Turinning “Yuventus”iga o‘tib ketdi. Uning o‘rnini esa klub afsonasi, bir mavsum davomida Chempionship klubi — “Derbi Kaunti”ni boshqargan Frenk Lempard egalladi. “Derbi” Frenk qo‘l ostida Premyer ligaga qaytishiga bir bahya qoldi. Klub so‘nggi bosqichda “Aston Villa”ga imkoniyatni boy berib, yo‘llanmadan quruq qoldi. Bundan tashqari “aristokratlar” uchun eng katta yo‘qotish — Eden Azarning “Real”ga o‘tib ketishi bo‘ldi. 28 yoshli belgiyalik futbolchi so‘nggi mavsumlarda klubning yaqqol yetakchisiga aylanganini ko‘rsata olgandi. Endi esa London klubi asosiy yulduzi va yetakchisisiz hujumdagi muammolarni hal etishi kerak bo‘ladi.

Frenk Lempard esa uning uchun eng asosiysi — jamoaga sodiq qolish ekanligini ta’kidlashdan charchamayapti. Agar futbolchi klubda asosiy tarkib uchun kurashishni xohlamaydimi, u bemalol ketishi mumkin. Gap kim haqida ketayotganligini bildingiz — David Luis. Transferlar oynasining so‘nggi kuni braziliyalik himoyachi Londonning boshqa bir klubi “Arsenal”ga o‘tib ketdi. Lempard esa uning ketishiga hech qanday qarshilik ko‘rsatmadi. Endi esa “Chelsi”da bir necha yillardan beri o‘zini ko‘rsatish imkoniyatidan mahrum bo‘lib kelgan Kurt Zuma Luisning yo‘qligini bildirmaslikka harakat qiladi. Har holda fransuz “Everton”dagi o‘yinlari orqali bunga yetarli darajada qodirligini ham ko‘rsata oldi.

“Manchester Yunayted”

“Qizil iblislar” murabbiy borasida hech qanday o‘zgarishlarni amalga oshirgani yo‘q. Mankunianlar rahbariyati Ole-Gunnar Sulsherga ishonishda davom etishini ma’lum qildi. Va bu ishonchini yozgi transferlar oynasida ham namoyish etdi. Jumladan, “qizillar” o‘z safini Aaron Uan-Bissaka, Harri Maguayr kabi qimmatbaho himoyachilar bilan to‘ldirib oldi. Sulsher “Liverpul”da Virjil van Deyk himoyani qanday tartibga solgan bo‘lsa, Maguayrning ham Manchesterda shunday ish qila olishiga ishonmoqda. Buni esa vaqt ko‘rsatishi tabiiy hol. Van Deyk allaqachon o‘ziga sarlangan millionlarni oqlab yubordi. Maguayr esa bosimni yengib o‘tgan holda, niderlandiyalikdan qolishmasligini isbotlashga harakat qiladi.

“Yunayted” transferlar oynasining so‘nggi kunida Romelu Lukakuni “Inter”ga sotib yubordi. Ammo klub uning o‘rniga biror hujumchini sotib olmadi. “Qizil iblislar” Markus Reshford hamda Antoni Marsial belgiyalik hujumchining yo‘qligini bildirmasligiga ishonmoqda.

Taxminiy tarkiblar

Qiziqarli ma’lumotlar

1. “Manchester Yunayted” barcha musobaqlar doirasida so‘nggi 6 ta o‘yindan beri o‘z maydonida “Chelsi”ga mag‘lub bo‘lmadi;
2. APLning so‘nggi 5 ta o‘yinida “Manchester Yunayted” g‘alaba nimaligini bilmadi;
3. “Manchester Yunayted” APLda mavsumni 26 marta o‘z maydonida boshlagan. Shundan faqat bitta o‘yinda (2014/15-yilgi mavsum “Suonsi”ga) mag‘lub bo‘lgan. 19 ta o‘yinda g‘alaba, 6 ta o‘yinda esa durang;
4. “Chelsi” va “Yunayted” APLda mavsum debyutidagi o‘yinlarni eng ko‘p yutgan ikki klub hisoblanadi. “Qizil iblislar”da 18 ta, “aristokratlar”da esa 17 ta g‘alaba;
5. Bu “Manchester Yunayted” hamda “Chelsi” uchun avval klubda o‘ynagan futbolchilarning endilikda murabbiy sifatida bir-biriga qarshi ilk o‘yini bo‘ladi. Sulsher—Lempard.
6. “Chelsi” “qizil iblislar” ustidan “Old Trafford”da 6 marta g‘alaba qozongan. Har oltitasida ham London klubini har xil murabbiy boshqargan.

Murabbiylar o‘yindan oldin

Men Frenk Lempardning bizga qarshi o‘ynamasligidan xursandman. Agar u o‘ynaganida, albatta, gol urgan bo‘lardi (kuladi). Men unga har qanday murabbiyga bo‘lgani kabi munosabat bilan yondashaman. Endi biz o‘yinchi emas, balki murabbiylarmiz.Ole-Gunnar Sulsher, “Manchester Yunayted” bosh murabbiyi

Klubdagi vazifalarimdan biri — atmosferani his qilib, kerak bo‘lgan vaqtda zarur so‘zlarni topa olishdan iborat. Ayni damda taktika borasida ishlarimiz yakuniga yetdi. Endi hammasi uni amalga oshirish va ishga bo‘lgan munosabatni shakllantirishdan iborat. Hammasi jamoaviy mehnatga bog‘liq.

Frenk Lempard, “Chelsi” bosh murabbiyi