Тошкентда ярим асрлик қайрағочларни ноқонуний кесган шахс ушланди
Тошкентда 8 август куни Экология ва атроф муҳитни муҳофаза қилиш давлат қўмитаси инспекторлари томонидан рейд ўтказилди, деб хабар бермоқда қўмита матбуот хизмати.
Рейд давомида ТТЗ автостанцияси яқинида магистрал йўл бўйлаб янги кесилган катта диаметрли дарахтларни ортиб кетаётган юк машинаси аниқланган.
Юк машинаси экологик назорат ва Давлат йўл ҳаракати хавфсизлиги хизмати ходимлари томонидан тўхтатилган ва олиб кетилаётган юк кўздан кечирилган.
Унда ёши 40—50 йиллар атрофида бўлган янги кесилган қайрағоч дарахтлари ташилгани ва юк эгаси Тошкент вилоятида яшовчи Б.Соипназаров эканлиги аниқланган.
Юк эгаси дарахтларнинг қонуний кесилганини тасдиқловчи ҳужжатни тақдим эта олмаган. Унинг айтишича, дарахтлар Қибрай туманидаги «Бўстон» сиҳатгоҳи ҳудудида кесиб олинган ва Тошкентнинг Учтепа туманидаги «Ўрикзор» қурилиш бозори яқинида жойлашган қурилиш ёғочини тайёрлаш цехига пилорамага олиб кетаётган бўлган.
Қўлга олинган шахс,шунингдек, бу ноқонуний фаолият билан 10 йилдан кўпроқ вақтдан бери шуғулланиб келишини тан олган. Ҳозирда Б. Соипназаровга нисбатан ҳуқуқ-тартибот идораларига топшириш ва қонунчиликка кўра чора кўриш учун материаллар тайёрланмоқда.
