Ўзбекистон Адлия вазирлиги Осиё тараққиёт банки (ОТБ)нинг Ўзбекистонда инвестиция муҳитини янада яхшилаш мақсадида Халқаро арбитраж ислоҳотини ўтказиш учун 225 минг доллар миқдоридаги техник кўмагини жалб қилди.
Адлия вазирлигидан маълум қилишларича, ОТБнинг техник кўмаги қуйидагиларни амалга оширишда ёрдам кўрсатишни назарда тутади:
- замонавий халқаро стандартларга мувофиқ «Халқаро тижорат арбитражи тўғрисида»ги қонунни ишлаб чиқиш, жумладан, халқаро экспертлар ва ОТБ томонидан қонун лойиҳасини ишлаб чиқишнинг турли босқичларида уни кўриб чиқиш ва хулосалар тақдим қилиш, шунингдек, ҳукумат ва бошқа манфаатдор томонлар билан қатор маслаҳатлашувлар ўтказиш;
- хорижий арбитраж қарорларини ва улар билан боғлиқ халқаро арбитраж низоларини тан олиш ва ижро қилиш ҳақидаги процессуал кодексларга тегишли ўзгартиш ва қўшимчаларни ишлаб чиқиш;
- Халқаро арбитраж ислоҳотини амалга оширишга кўмаклашиш мақсадида ҳуқуқни қўлловчи сифатида судьялар ва амалиётчи-ҳуқуқшуносларнинг ҳамда ҳуқуқдан фойдаланувчилар сифатида хусусий секторнинг салоҳиятини ошириш.
Мазкур лойиҳани амалга ошириш Ўзбекистонда халқаро тижорат низоларини ҳал қилишнинг муқобил механизмлари ривожланишига, хусусан мамлакат ҳудудининг минтақавий арбитраж маркази сифатидаги ўрнини мустаҳкамлашга ҳамда янада жозибадор инвестицион муҳит шаклланишига хизмат қилади.
Изоҳ (0)