9 августнинг эътиборга молик янгиликлари — «Дарё» дайжестида.
Ўзбекистонда ўрнатилган янги электр ҳисоблагичлар истеъмолчиларда оммавий норозилик юзага келтирмоқда.
«Ялпи ўрнатилаётган янги ҳисоблагичлар аввалги ҳисоблагичларга қараганда 2,5 баравар кўп электр энергиясини сарфламоқда. Худди одамлар уйларига металл эритувчи печлар ўрнатган, оддий лампочкалар ўрнига эса прожекторларни ишлатишмоқда», — деб ёзади истеъмолчилардан бири.
Энергетика вазирлиги аҳолининг янги ҳисоблагичлар 2 баравар кўп ток «еяётгани» ҳақидаги эътирозларига изоҳ берди.
Вазир ўринбосари Шерзод Хўжаевнинг айтишича, эски электр ҳисоблагичлар хонадондаги мавжуд электр истеъмолини аниқ ҳисобламаган. Янги тартибдаги ҳисоблагичлар эса ҳатто телефон қувватлантириш учун сарфланадиган электр миқдорини ҳам ҳисоблайди.
***
Ўзбекистонда доллар курси кескин кўтарилди. 10 августдан бошлаб 1 АҚШ доллари 8882 сўм этиб белгиланди. Марказий банк ушбу ҳолатнинг шаклланишига қатор ташқи ва ички омиллар таъсир кўрсатганини маълум қилди.
***
Бухородаги тамаддихонада мижознинг ликопчасидан қорадори топилди.
«Текширувда у овқатланаётган столдаги ошхона ликопчасидан 0,23 грамм «гашиш» гиёҳвандлик моддаси топилиб, тегишли тартибда ҳужжатлаштириб олинди. Тушликни «ўзгача» ўтказишни ният қилган шахснинг қилмиши амалга ошмай қолди», — дейилади хабарда.
***
Россиялик таниқли продюсер Максим Фадеев асли ўзбекистонлик бўлган қўшиқчи Наргиз Зокирова билан шартномани бекор қилди.
«Ўзингни тартибга келтиришнинг энг тез усули: 1) Қулоғингга илинган лағмонлардан қутулиш… 2) Кўнглингдаги тошлардан ҳалос бўлиш… 3) Бўйнингга ўтириб олган сурбет одамларни тушириш. Бўлди!», — дейди продюсер.
***
Қирғизистон собиқ президенти Алмазбек Атамбаев суд қарорига кўра 26 августга қадар ҳибсга олинди.
Таъкидланишича, собиқ президентни қўлга олиш вақтида бир қатор процессуал нормалар бузилган. «Ҳимоям остидаги одамни қўлга олиш бўйича ҳеч қандай ҳужжат тақдим этилмаган, уни огоҳлантиришган ва тезда қўлга олиш бўйича чора кўрилган», — дейди Атамбаевнинг адвокати.
Изоҳ (0)