Ўзбекистон Республикаси Олий Мажлиси Сенати раиси Танзила Норбоева бошчилигидаги делегациянинг Корея Республикаси президенти Мун Чже Ин билан учрашуви бўлиб ўтди. Бу ҳақда Сенат ахборот хизмати «Дарё»га хабар берди.
Ушрашувда Корея Республикаси президенти Мун Чже Ин Ўзбекистон Республикаси парламенти делегациясини қутлар экан, жорий йил апрель ойида Ўзбекистондаги илиқ ва самимий қабул учун Ўзбекистон Республикаси Президенти Шавкат Мирзиёевга яна бир бор миннатдорлигини билдирди.
«Шу билан бирга, Мун Чже Ин Ўзбекистонда амалга оширилаётган кенг қамровли ислоҳотлар ва янгиланишларга юқори баҳо берди.
Корея Республикаси президенти икки мамлакат ўртасидаги муносабатлар барча йўналишларда фаол ривожланаётганлигини мамнуният билан қайд этди. Давлат раҳбарлари ўртасидаги яқин ва ишончли алоқалар Ўзбекистон—Корея муносабатлари алоҳида стратегик шерикликнинг янги поғонасига кўтарилишига замин яратди», — дейилади хабарда.
Учрашувда Мун Чже Ин ташриф доирасида эришилган келишувлар муваффақиятли рўёбга чиқарилаётганини, Ўзбекистонда уларни амалга ошириш учун мониторинг гуруҳи ташкил этилганини таъкидлаб, бу борада юзага келадиган барча масалаларни шахсан ўзи ҳал этишга тайёр эканини билдирди.
Ўзбекистонда турли миллат ва элат вакиллари тинч-тотув яшаётганлигини таъкидлар экан, Корея етакчиси Ўзбекистонда корейс миллати вакилларига кўрсатилаётган илиқ муносабат учун ўзбек халқига яна бир бор ўз ташаккурини изҳор қилди.
Учрашув якунида Мун Чже Ин Ўзбекистон Президентига чуқур ҳурмати ва эҳтиромини изҳор қилди, ўзаро алоқаларни янада мустаҳкамлашга умид билдирди ва Шавкат Мирзиёевни Корея Республикасига ташриф буюришини таклиф қилди.
Изоҳ (0)