Yangi elektr hisoblagichlardan norozi o‘zbekistonliklar, keskin ko‘tarilgan dollar kursi, mijozning likopchasidan chiqqan qoradori va kunning boshqa xabarlari
9-avgustning e’tiborga molik yangiliklari — “Daryo” dayjestida.
O‘zbekistonda o‘rnatilgan yangi elektr hisoblagichlar iste’molchilarda ommaviy norozilik yuzaga keltirmoqda.
“Yalpi o‘rnatilayotgan yangi hisoblagichlar avvalgi hisoblagichlarga qaraganda 2,5 baravar ko‘p elektr energiyasini sarflamoqda. Xuddi odamlar uylariga metall erituvchi pechlar o‘rnatgan, oddiy lampochkalar o‘rniga esa projektorlarni ishlatishmoqda”, — deb yozadi iste’molchilardan biri.
Energetika vazirligi aholining yangi hisoblagichlar 2 baravar ko‘p tok “yeyayotgani” haqidagi e’tirozlariga izoh berdi.
Vazir o‘rinbosari Sherzod Xo‘jayevning aytishicha, eski elektr hisoblagichlar xonadondagi mavjud elektr iste’molini aniq hisoblamagan. Yangi tartibdagi hisoblagichlar esa hatto telefon quvvatlantirish uchun sarflanadigan elektr miqdorini ham hisoblaydi.
***
O‘zbekistonda dollar kursi keskin ko‘tarildi. 10-avgustdan boshlab 1 AQSh dollari 8882 so‘m etib belgilandi. Markaziy bank ushbu holatning shakllanishiga qator tashqi va ichki omillar ta’sir ko‘rsatganini ma’lum qildi.
***
Buxorodagi tamaddixonada mijozning likopchasidan qoradori topildi.
“Tekshiruvda u ovqatlanayotgan stoldagi oshxona likopchasidan 0,23 gramm “gashish” giyohvandlik moddasi topilib, tegishli tartibda hujjatlashtirib olindi. Tushlikni “o‘zgacha” o‘tkazishni niyat qilgan shaxsning qilmishi amalga oshmay qoldi”, — deyiladi xabarda.
***
Rossiyalik taniqli prodyuser Maksim Fadeyev asli o‘zbekistonlik bo‘lgan qo‘shiqchi Nargiz Zokirova bilan shartnomani bekor qildi.
“O‘zingni tartibga keltirishning eng tez usuli: 1) Qulog‘ingga ilingan lag‘monlardan qutulish… 2) Ko‘nglingdagi toshlardan halos bo‘lish… 3) Bo‘yningga o‘tirib olgan surbet odamlarni tushirish. Bo‘ldi!”, — deydi prodyuser.
***
Qirg‘iziston sobiq prezidenti Almazbek Atambayev sud qaroriga ko‘ra 26-avgustga qadar hibsga olindi.
Ta’kidlanishicha, sobiq prezidentni qo‘lga olish vaqtida bir qator protsessual normalar buzilgan. “Himoyam ostidagi odamni qo‘lga olish bo‘yicha hech qanday hujjat taqdim etilmagan, uni ogohlantirishgan va tezda qo‘lga olish bo‘yicha chora ko‘rilgan”, — deydi Atambayevning advokati.
