APЛда трансфер ойнаси ёпилди. Сўнгги куннинг асосий трансферлари битта саҳифада

8 август, пайшанба куни Англияда трансфер ойнаси расман ёпилди. Сўнгги лаҳзаларда бир нечта клуб янги футболчиларни ўз сафига қўшиб олди.

«Дарё» инглиз клубларининг сўнгги трансфер кунида амалга оширган трансферларини бир саҳифага жамлади:

«Арсенал» икки ҳимоячини ўз сафига қўшиб олди

«Селтик» клуби чап қанот ҳимоячиси Киран Тирни лондонликлар билан 6 йиллик шартнома имзолади. Маълумотларга кўра, «Арсенал» футболчи учун 25 миллион фунт тўлаган.

«Канонирлар» «Челси» ҳимоячиси Давид Луизни ҳам қўлга киритди. Хабарларга кўра, бразилиялик ўйинчи билан 2 йиллик келишув имзоланган, трансфер эса тахминан 8 миллион фунт атрофида баҳоланган.

***

«Манчестер Сити» 33 ёшли дарвозабонни ижарага олди

«Дерби Каунти» дарвозабони Скотт Карсон «шаҳарликлар» сафига қўшилди. Англия термасининг собиқ посбони амалдаги чемпион таркибида бир йил ижара асосида ҳаракат қилади.

***

«Эвертон» клуби «Арсенал» ҳужумчисини сотиб олди

«Арсенал» ҳужумчиси Алекс Ивоби фаолиятини «Эвертон»да давом эттирадиган бўлди. 23 ёшли футболчи Ливерпуль шаҳри клуби билан 2024 йилга қадар мўлжалланган шартнома имзолади. Трансфер 35-40 миллион фунт атрофида бўлгани хабар қилинмоқда.

Шунингдек, «Эвертон» босниялик футболчиси Муҳаммад Бешични «Шеффилд Юнайтед»га ижарага бериб юборди.

***

«Тоттенҳэм» ҳам иккита трансферни эълон қилди

«Бетис» клуби ярим ҳимоячиси Джовани Ло Чельсо ушбу мавсумни «шпорлар» сафида ўтказади. «Тоттенҳэм» 23 ёшли футболчини сотиб олиш ҳуқуқи билан 2020 йилнинг ёзига қадар ижарага олди.

«Фулҳэм» клубининг ярим ҳимоячиси Райан Сессеньон фаолиятини «Тоттенҳэм»да давом эттиради. Лондонликлар 19 ёшли футболчи билан 6 йиллик шартнома имзолаган. Инглиз нашрлари хабарларига кўра, ёш иқтидорнинг трансфери 25 миллион фунт атрофида бўлган.

***

«Лестер» Бельгия термаси футолчисига эга чиқди

«Сампдория» ярим ҳимоячиси Дэннис Прат лестерликлар билан 2024 йилгача амалда бўладиган келишув имзолади. Хабарларга кўра, «Лестер» 25 ёшли футболчи трансфери учун 18 миллион фунт тўлаган.

***

Керролл «Ньюкасл»га қайтди

30 ёшли англиялик ҳужумчи 18 йиллк танаффусдан сўнг ўзи тарбия топган клубга қайтди. Эркин агент мақомидаги футболчи «ҳаккалар» билан бир йиллик шартнома имзолади.

***

Кетганлар ҳақида

Трансфер ойнасининг сўнгги кунида «Челси» икки футболчиси қўйиб юборди. Давид Луиз «Арсенал» сафига ўтган бўлса, Дэнни Дринкуотер ярим йилга «Бёрнли» сафига йўл олди.

«Манчестер Юнайтед» ҳужумчиси Ромелу Лукаку «Интер»га йўл олди. Манкунианлар клуби унга ўринбосар сотиб олишга улгурмади.