Жорий йил 5 август куни Давлат божхона қўмитаси Давлат хавфсизлик хизмати билан ҳамкорликда Тошкент вилояти божхона бошқармаси «Яллама» чегара-божхона постига туташ ҳудудда ўтказган тезкор тадбир давомида жисмоний шахслар ва божхона ходимларидан иборат жиноий гуруҳ фаолияти фош қилинди. Бу ҳақда «Дарё»га қўмита ахборот хизмати маълум қилди.
Жиноий гуруҳ аъзолари юк автотранспорт воситаларини мазкур пост орқали навбатсиз ва тезлаштирган ҳолда ўтказишни ваъда қилиб, автотранспорт воситалари ҳайдовчилари ва тадбиркорлардан тамагирлик йўли билан пора олиб келган.
Ҳозирда мазкур ҳолат юзасидан жиноят иши қўзғатилиб, тергов-тезкор ҳаракатлари олиб борилмоқда.
«Давлат божхона қўмитаси республика чегара-божхона постлари орқали ҳаракатланаётган юк автотранспорт воситалари ҳайдовчилари ва ташувчиларни пост орқали навбатсиз ва тезкорлик билан ўтказишни ваъда қилувчи фирибгарларнинг алдовларига ишонмасликларини сўраб қолади. Жиноят ишининг тергов натижалари ҳақида қўшимча маълумот бериб борилади», — дейилади хабарда.
Маълумотларга кўра, жиноятчиларни қўлга олиш тезкор тадбирига Давлат божхона қўмитаси раиси Муроджон Азимовнинг шахсан ўзи раҳбарлик қилган ва иштирок этган.
Изоҳ (0)