Inter Tourism томонидан олди-сотди шартномасида белгиланган мажбуриятлар ўз вақтида бажарилмагани сабабли томонлар ўртасидаги шартнома бекор қилинган, дея хабар берди Spot.
2018 йил 9 мартдаги шартномага кўра, собиқ «Чорсу» меҳмонхона мажмуаси Inter Tourism МЧЖ шаклидаги хорижий корхонага 33 миллион доллар миқдорида инвестиция киритиш орқали сотилган ҳамда 270 ўринга мўлжалланган 4 юлдузли меҳмонхона мажмуасини қуриш ва 350 та янги иш ўрнини яратиш шарти қўйилган эди.
Ҳукуматнинг тегишли топшириғига кўра, Давлат активларини бошқариш агентлиги собиқ «Чорсу» меҳмонхона мажмуасидан самарали фойдаланишни ташкил этиш мақсадида мазкур объектни инвестиция мажбуриятларини бажариш шарти билан такроран оммавий савдога чиқаришни кўзда тутган.
Айни дамда Вазирлар Маҳкамаси қарорининг лойиҳаси тайёрланиб, тегишли вазирлик ва идоралар билан келишилмоқда.
Январь ойида Аҳмет Демир «Чорсу» меҳмонхонасини реконструкция қилиш ишлари нега сустлашганига изоҳ бериб, ишлар кўнгилдагидек эмаслиги, қоғозбозлик муаммосига дуч келаётганини таъкидлаган эди.
Унинг сўзларига кўра, йирик иншоотда намунали хизмат кўрсатиш учун қўшимча ер керак бўлиб, Тошкент шаҳар ҳокимияти ва бошқа мутасаддиларга қўшимча ер майдони ажратиш бўйича мурожаат этилган. Натижада яна 3 гектар ер қўшиб берилишини ваъда қилинган, аммо бугунги кунга қадар ер тақдим этилмаган.
Тошкент шаҳар ҳокими Демир Group Ўзбекистонга 30 миллион доллар миқдорида инвестиция киритиш ҳисобига «Чорсу» меҳмонхонасини мутлақо текинга олганини ва ташқаридан Ўзбекистонга 30 миллион доллар миқдорида инвестиция киритмаганлигини қайд этди.
Демир Group компанияга қарашли Тошкентда янги очилган ресторан «Чорсу» меҳмонхонаси бизнесининг бир қисми бўлиб, шу орқали меҳмонхонада сервис хизматини кўрсатувчи персонални шакллантириб борилиши ҳақида маълум қилган эди.
Изоҳ (0)