Ички ишлар вазири Пўлат Бобожонов «O‘zbekiston 24» телеканалига Жаслиқ колонияси тугатилишининг аҳамияти ҳақида интервью берди, деб хабар бермоқда «Халқ сўзи Online».
Ўзбекистон Президенти Шавкат Мирзиёев 2019 йил 2 август куни «Қорақалпоғистон Республикаси Ички ишлар вазирлигининг 19-сон ихтисослаштирилган жазони ижро этиш колониясини тугатиш тўғрисида»ги («Жаслиқ» қўрғонида жойлашган) қарорни имзолаган эди.
ИИВ раҳбари Пўлат Бобожонов 1999 йилда Қўнғирот туманининг Жаслиқ қўрғонида қурилган колониянинг ёпилиши тўғрисидаги қарор Ўзбекистоннинг халқаро обрўсига ижобий таъсир кўрсатишини қайд этган.
Вазир бу ерда оғир ва ўта оғир жиноятлар содир қилган ва узоқ муддат озодликдан маҳрум қилиш жазосига ҳукм қилинган шахслар сақланиб келинаётгани, ушбу колония нафақат бизнинг фуқаролар орасида, қолаверса, халқаро ташкилотлар орасида ҳам салбий ном қозонган колония ҳисобланишини қўшимча қилган.
«Бу колонияни муҳтарам Президентимиз қарори билан тугатиш нима учун зарур бўлиб қолди? Биринчидан, жойлашиши — Нукус шаҳридан 300 километр, Қўнғирот туман марказидан эса 180 километр узоқликда. Иккинчидан, иқлимини олсак, қишда қаҳратон совуқ, ёзда жазирама иссиқ. Жазони ўтаётган шахслар, уларнинг қариндошлари, яқинларининг келиб-кетишларига ҳам ўта ноқулай», — деган у.
«Сиз бир тасаввур қилинг, Фарғона вилоятидан, Андижон ёки Сурхондарё вилоятидан ота-она ёки фарзандлари билан ўша ерда жазо ўтаётган маҳкумни кўриш учун келиш жуда кўп масофа босиб, Жаслиқ қўрғонига борилар эди», — деб айтиб ўтган Бобожонов.
Ўз навбатида ички ишлар вазири «Жаслиқ» жазони ижро этиш колониясида 5000 дан 10000 кишигача, шунингдек, 5000 нафаргача диний экстремистларнинг сақланиши тўғрисидаги хабарларни рад этди.
«Мазкур муассасанинг бугунги кундаги лимити 1100 ўрин. Ҳозирги кунда 395 нафар маҳкум сақланаяпти ва шуларнинг атиги 10 фоизи диний-экстремистик жиноятлар учун жиноий жавобгарликка тортилган шахслардир», — дея бунга изоҳ берган у.
ИИВга бир ой муддатга Жаслиқда сақланаётган маҳкумларни суд томонидан белгиланган тартиб турига мувофиқ равишда ички ишлар органларининг бошқа жазони ижро этиш колонияларига ўтказиш топширилган.
Пўлат Бобожонов Президентнинг тегишли Фармони билан 2017 йилдан буён 4000 нафарга яқин маҳкум афв этилганини эътироф этар экан, озод қилинган шахслар давлат ва жамият эътиборидан четда қолаётгани йўқлигини таъкидлаган.
Изоҳ (0)