Farg‘ona viloyatining Qo‘shtepa tumanida 28-iyul kuni soat taxminan 22:30 larda YTH yuz bergan. Farg‘ona viloyati IIBdan olingan ma’lumotga ko‘ra, Qo‘shtepa tumani “Fayz” MFYda yashovchi 33 yoshli O.R. boshqaruvidagi “VAZ-2106” (“Jiguli”) rusumli avtomashinasini “Qo‘shtepa—Chimkent” yo‘lida haydab ketayotib, qarama-qarshi yo‘nalishdan harakatlanib kelayotgan Qo‘shtepa tumani “Sohibkor” MFYda yashovchi 28 yoshli R.O. boshqaruvidagi Lacetti rusumli avtomashinasi bilan to‘qnashuv sodir etgan.
“Daryo” manbasining ma’lum qilishicha, YTH oqibatida “Jiguli” yo‘lovchisi Qo‘shtepa tumani “Yangiariq” MFY Navnihol ko‘chasida yashagan 48 yoshli Ulug‘bek Ahmadjonov hayotdan ko‘z yumgan. Dastlab, Ulug‘bek Ahmadjonov ochiq miya shikasti tashxisi bilan Langar ShTTYoM jonlantirish bo‘limiga yotqizilgan. Ko‘rsatilgan tibbiy muolajalarga qaramasdan, shifokorlar uning hayotini saqlab qola olmagan.
Rasman tasdiqlanmagan ma’lumotga ko‘ra, Qo‘shtepa tumani obodonlashtirish bo‘limida ishlagan marhum Ulug‘bek Ahmadjonov va uning hamkasblari Rishton tumanida o‘tkazilgan hashardan qaytayotgan bo‘lgan. YTH natijasida tan jarohati olib, Langar ShTTYoMga olib kelingan yana bir yo‘lovchining ahvoli og‘ir ekani aytilmoqda. Shuningdek, Lacetti yo‘lovchisi 1991-yilda tug‘ilgan Sh.Yu. ham davolanish uchun Langar ShTTYoMga yotqizilgan.
YTHga Lacetti haydovchisining qarama-qarshi harakat yo‘liga chiqib ketgani sabab bo‘lgan.
Holat yuzasidan 29-iyul kuni Lacetti haydovchisiga nisbatan Jinoyat Kodeksining 266-moddasi (Transport vositalari harakati yoki ulardan foydalanish xavfsizligi qoidalarini buzish) 1-qismi bilan jinoyat ishi qo‘zg‘atilib, tergov harakatlari olib borilmoqda.
Eslatib o‘tamiz, 27–28-iyul kunlari Farg‘ona viloyatining Rishton tumanida hashar o‘tkazilib, unda butun viloyatning shahar va tumanlaridan 13562 nafar hasharchi ishtirok etgan. Bandlik va mehnat munosabatlari vazirligi ushbu hasharni noqonuniy deb atagan.
Izoh (0)