Қишлоқ хўжалиги маҳсулотларини чуқур қайта ишлаш ва озиқ-овқат саноатини янада ривожлантириш бўйича қўшимча чора-тадбирлар тўғрисидаги Президент қарори қабул қилинди.
Қарорга мувофиқ, Ўзбекистонда 2019–2021 йилларда қишлоқ хўжалиги маҳсулотларининг асосий турларини қайта ишлаш ва экспорт қилишнинг прогноз кўрсаткичлари тасдиқланди.
Унга кўра, 2019 йилда жами 16 628 минг тонна мева-сабзавот ишлаб чиқариш, 2 692 минг тонна мева-сабзавотни қайта ишлаш ҳамда 2 062,4 минг тонна мева-сабзавотни экспорт қилиш белгиланган.
2019 йил 1 августдан:
қишлоқ хўжалиги маҳсулотини экспорт қилувчиларнинг маҳсулотни сертификатлаштириш бўйича харажатлари Экспортни рағбатлантириш агентлиги томонидан қопланади;
қишлоқ хўжалиги маҳсулотларини қайта ишлаш соҳасидаги инвестиция лойиҳаларини амалга ошириш учун Тадбиркорлик фаолиятини ривожлантиришни қўллаб-қувватлаш давлат жамғармаси маблағлари ҳисобидан тегишли тартибда фоиз ҳаражатларини қоплаш компенсациялари ҳамда кредит суммасининг 50 фоизигача, бироқ 8 миллиард сўмдан ошмаган миқдорда кафилликлар берилади;
самарасиз боғлар ўрнида интенсив боғлар ташкил этиш учун қонунчиликда белгиланган қўллаб-қувватлаш чоралари татбиқ этилади.
Қарор билан:
марказий карантин лабораторияси ҳамда Сирдарё, Сурхондарё, Қашқадарё ва Хоразм вилоятлари ҳудудий инспекцияларининг замонавий лаборатория биноларини қуриш ишлари 2020 йил 1 апрелга қадар якунлаш;
2020 йил 1 сентябргача марказий карантин лабораториясини халқаро аккредитациядан ўтказиш;
2020 йил 1 ноябргача марказий ва ҳудудий карантин инспекцияларини қўшимча 5 та сайёр (мобил) лаборатория билан таъминлаш чораларини кўриш белгиланди.
Изоҳ (0)