Аи-91 маркасидаги бензин нархи (ҳозир 4500 сўм) 15 августдан биржа савдолари орқали белгиланиши Вазирлар Маҳкамасининг 30 июлдаги «Ёқилғи-энергетика ресурсларининг нарх ва тарифларини ўзгартириш тўғрисида»ги қарорида кўзда тутилган, деб ёзади «Газета.uz».
«Ўзбекнефтьгаз» компанияси тушунтиришича, Аи-91 нархи энди қатъий белгиланган бўлмайди. Ҳозирда унинг нархи 1 литр учун 4500 сўмга тенг.
«91-бензинни сотадиган ёқилғи қуйиш шохобчалари энди уни биржа савдоларида сотиб олади ва ўз харажатларидан келиб чиқиб нарх белгилайди. Илгари бензин тўғридан тўғри шартномалар ва ҳукумат томонидан белгиланган нархлар бўйича сотиларди», — дейишди компанияда.
Айни пайтда нефт базалари Аи-91 бензинини ёқилғи қуйиш шохобчаларига ҳар бир литрини 3793,5 сўмдан сотмоқда. Энди нарх назорат қилинмайди.
«Нарх биржа савдоларида бозор конъюнктураси, талаб ва таклифдан келиб чиқиб, эркин белгиланади. Авваллари 4500 сўмдан 285 сўм истеъмол солиғи (ҳозирда акциз солиғи) чиқариб ташланар, ундан яна 10 фоиз чиқариб ташланар эди. Шундай тушунча бор: ‘АЁҚШ чегирмаси’ — автоёқилғи станцияларига хизмат кўрсатгани учун бериладиган сумма. Яъни ‘Ўзнефтьмаҳсулот’ истеъмол солиғи ҳисобдан чиқарилиши эвазига 10 фоизли чегирма беради. Якунда 3793,5 сўм ҳосил бўлади», — дея аниқлик киритишди компанияда.
Ўзбекистон Республика товар-хом ашё биржаси маълумотларига кўра, 22—26 июль кунлари Аи-91 автобензини нархи бир тонна (1293 литр) учун 7,1 миллион сўмни ёки бир литр учун тахминан 5492 сўмни ташкил қилган. Ўтган ҳафта ичида бензин котировкалари биржада 20,7 фоизга ўсган.
Изоҳ (0)