Бухоро шаҳри марказида, Арк мажмуаси ёнидаги хиёбонда каллакланиб, сийраклатилган дарахтлар аста-секин қуриб бормоқда. Бу ҳақда «Дарё»га журналист Наргис Қосимова маълум қилди.
Вилоят Ўзбекистоннинг иссиқ ҳудудларидан бири, бу ерда ҳаво ҳарорати ёз ойларида 60 даражага етади. Шаҳарни жазирама иссиқдан эса айнан дарахтлар асрайди. Қўл-оёғи олиб ташланган мисол «буталган» дарахтларнинг баъзилари яшаб қолишга интилиб, озгина шох ва барг чиқарган, қолганлари аста-секин қуриб бормоқда. Бутун дунёда иқлим ўзгаришининг олдини олиш мақсадида дарахт экилаётган бир пайтда нафақат дарахтларни кесиш, балки уларни бефаросатларча каллаклаш орқали «ўлдирмоқдамиз».
«Ош ва сумалак пишириш бўйича рекорд ўрнатгунча, дарахт экиш бўйича жаҳон рекордини ўрнатсак бўлмайдими? Хиёбондан ўтар чоғим икки хорижий сайёҳ каллакланган дарахтларни суратга олаётганига кўзим тушди. Хаёлимдан ўтган фикрларни ўқигандек, ёнимдаги бухоролик ҳамроҳим атиги 2-3 йил аввал хиёбонда дарахтларнинг соясидан умуман офтоб тушмаслиги, ёз жазирамасида ҳам атрофда яшовчилар болалари билан шу ерга келишганини сўзлаб берди. Ҳозир эса хиёбон бўм-бўш. Уни кесиб ўтаётган одамлар ҳам тезроқ бинолар соясига ўтишга ошиқади.
Бухоро мисолидаги дарахтларни ‘буташ’ га келсак, вилоятлар ободонлаштириш бошқармаларига агроном-боғбон ва эколог штатини киритиш зарур. Келаси йилга қолган дарахтлар ҳам шу тарзда каллакланса (‘буталади’ дейишга тил бормайди), нафақат сайёҳлар, балки маҳаллий аҳоли ҳам фақат қуёш ботганда кўчага сайрга чиқса ажаб эмас», — дейди Наргис Қосимова.
Изоҳ (0)