Сўнгги пайтларда ҳокимият вакилларининг «қовун тушириши»дан ажабланмай қўйдик, тўғриси. Уларнинг оқни қора, қорани эса оқ дея оқимга қарши чиқиши одатий ҳолга айлангандек, назаримизда. Ёдингизда бор, Касби тумани ИИБ бошлиғи Чори Кўчаровнинг 16 июлдаги қилмиши дунёга овоза бўлди. Воқеа тафсилотларини ўрганган интернет сайтларию, ижтимоий тармоқ фойдаланувчилари орқали ушбу воқеадан барча бирдек хабар топди.
Касби тумани ҳокимлигидан «Дарё» интернет-нашрига эътироз хати келиб тушди. Ҳокимлик туман ИИБ бошлиғи Чори Кўчаров ҳақида ёритилган ҳақиқатни бўҳтон деб атаб, фермерлар ишчилари ва миробларни ўз услубида жазолаган ИИБ бошлиғини эса «меҳнати, тиришқоқлиги ва ўз билими билан намуна бўлиб келаётган» қаҳрамонга айлантирган.
Маълум қилинишича, 22 июль куни туман ҳокими, туман прокурори, ИИБ бошлиғи ва Солиқ инспекцияси бошлиғи иштирокида бўлиб ўтган йиғилишда, йиғилиш қатнашчилари Чори Кўчаров қилмиши ҳақида сўз юритган интернет сайтлари муаллифларини айтган гапларига асос келтирмаганликда айблаган. Жумладан, ҳокимлик муносабатида шундай дейилади: «Видеотасвир ва мақолалар муаллифлари «зековоз» автомашиналарига одамлар мажбуран чиқарилганлиги ҳақидаги бўҳтонларига ҳеч қандай асос келтира олишмаган».
Интернет сайтлари муаллифлари жумаладан «Дарё» мухбири ҳам ўз мақоласида Касби тумани ИИБ бошлиғи қилмиши ҳақида сўз юритганда, фермер ишчилари ва 2 нафар мироб автобусга чиқарилганини ёзади. Ва суҳбатдошларнинг дала семинарига 20 нафар ИИБ ходимлари билан биргаликда «зековоз» — маҳбусларни олиб кетувчи автомобиль ҳам олиб келингани ҳақидаги фикрларини оммага улашади. Аммо «зековоз»га одам миндирилгани хусусида лом-лим демайди. Ҳокимият эса муаллифларни «зековоз»га одам миндирди деб ёзган дея айблаяпти.
Туман ҳокимлиги Чори Кўчаровни оқлаш илинжида дала семинари вилоят ҳокими ва туман ҳокими фармойишига кўра, 2019 йилнинг 2 июлидан 16 июлига қадар ҳар куни эрталаб 6:00 ва 12:00 да ўтказилиши кераклигини ёзиб, семинар кўргазмали эканлигига урғу беради. Қизиқ, ижтимоий тармоқлар ва фермерлар тақдим этган видеоларда семинар ўтказилаётган жойда бирорта ҳам кўргазма қуроллари кўринмай, «зековоз» ва ИИБ ходимлари кўриниб қолган. Ёки ИИБ бошлиғининг кўргазмали семинарида 20 нафар ИИБ ходимлари, кишан, «зековоз» ва автобус кўргазмали қуроллар вазифасини ўтаб берадими?
Бунданам қизиғи ҳокимлик журналистларни иккинчи томон фикрини эшитмасликда айблайди. Ҳолбуки, ўша куни «Дарё» мухбири ИИБ бошлиғи билан бир неча маротаба боғланишга уринди. Вилоят ИИБ матбуот хизмати орқали ҳам ҳолатга изоҳ сўради. Бу ҳақда мақолада ҳам сўз борган. Бироқ Чори Кўчаров хатти-ҳаракатига изоҳ беришни истамади. Қисқасини айтганда, журналистлар билан гаплашишни ўзига «эп кўрмади».
Ҳокимликка кўра, ўша кунги семинарда ИИБ бошлиғи билан биргаликда туман қишлоқ хўжалиги бўлими бошлиғи А.Арабов, туман агроинспекция бошлиғи Қ.Бозоров ҳам иштирок этган. Семинарга 58 нафар фермер чақирилган бўлса-да, 11 нафар фермер сабабсиз келмаган. 8 нафар фермер ўрнига уларнинг ишчилари келган. Ҳокимликнинг ёзишича, ўша куни фермер ишчиларию, 2 нафар сувчидан иборат 10 киши ИИБ томонидан ҳеч қандай куч ишлатилмаган ҳолда, деразалари очиқ автобусда ИИБга олиб кетилган.Ва ўша жойда тушунтириш хатлари олиниб, қисқа муддатда ИИБ ҳовлисидан қўйиб юборилган.
Энди ҳокимликка савол: Семинарда қатнашган 8 нафар фермер ишчилари ва 2 нафар сувчига дала семинарининг ўзида тушунтириш ишлари олиб борилса бўлмасмиди? Ҳеч кимни қўрқитиш нияти йўқ экан, 10 нафар кишинининг 20 нафар ИИБ ходими қуршовида худди айбдорлардек ИИБ биносига олиб борилиши нимадан далолат? Кўргазмали семинарга «зековоз» нега керак?
Туман ҳокимлиги ўз муносабатида фермер Акром Новотов ҳақида ҳам тўхталиб ўтиб, уни туҳмат қилишда айблайди. Ҳокимлик иддаосига кўра, Акром Новотов доимий равишда Тошкент шаҳрининг Шайхонтоҳур туманида турса-да, «ИИБ ходимлари уйимга келди», дея оммани чалғитган. Шу боисдан ҳам 22 июль куни ўтказилган ҳокимлик йиғилишида туман прокурори, туман «Нуроний» жамғармаси раиси ва бир неча фермерлар Акром Новотовнинг хатти-ҳаракатини қоралаган.
Фермер Акром Новотов «Дарё» мухбири билан суҳбати давомида ИИБ бошлиғининг хатти-ҳаракатлари ошкор этилган мақоладан сўнг, ИИБ ходимлари ўша куни семинарда қатнашган фермерлардан ҳақиқатни инкор этувчи тушунтириш хатлари ҳам олган. Ҳатто ўша куни қўлига кишан тақилган сувчилардан ҳам интернетда чиқиб кетган маълумотларни рад этувчи тушунтириш хати ёзиб беришини сўраган. Аммо сувчилар буни рад этишган.
Касби тумани ИИБ бошлиғи Чори Кўчаровнинг хатти-ҳаракати ҳақида интернетда шов-шув тарқалгач, «Дарё» мухбирига Касби туманининг Қамаши қишлоғида яшовчи Азиз Ниёзов ҳам мурожаат қилиб, Чори Кўчаровдан азият чекканини, аммо қайси ташкилотга мурожаат қилса ҳам масала эътиборсиз қолиб келганини билдирди.
— Кечаси ухлаб ётган жойимда ётоғимга кириб келган Касби тумани ИИБ ходимлари бошлиқ Чори Кўчаров топшириғига кўра, мени ётоқхонамда ўласи қилиб урди, — дейди Азиз Ниёзов. – ИИБ ходимларининг ярим кечаси уйимизга дабдурустдан бостириб кириши ва мени уриши фарзандларимни қўрқитиб юборган.
Азиз Ниёзовнинг маълумот беришича, у 2018 йил август ойида базмдан ширакайф бўлиб чиққач, қишлоқдошлари билан жанжаллашган. Боз устига фуқароларни тинчлантиришга уринган, маҳалла профилактика инспекторига ҳам зўрлик ишлатиб, погонини юлиб олган, телефонини тортиб олган. Бунга жавобан эса Чори Кўчаров бошчилигидаги ИИБ ходимлари айбдорни ухлаб ётган жойида, ётоқхонасида, фарзандлари кўз ўнгида ўласи қилиб калтаклайди.
— Майли мен қилган хатоим учун 3 ойга қамалиб чиқдим, ҳаракатимга жавоб бердим, — дейди Азиз Ниёзов. – Нега энди Чори Кўчаров хатти-ҳаракатига жавоб бермаяпти? Нима учун кечаси фуқаро хонадонига бостириб кирган ИИБ бошлиғи фарзандларим олдида мени калтаклагани ва хўрлагани ҳақидаги мурожаатларимга эътибор қаратилмаяпти?
Мурожаатчининг айтишича, у ИИБ бошлиғи Чори Кўчаров ҳаракати устидан мутасадди ташкилотларга кўп маротаба мурожаат қилган. Аммо мурожаатлари натижасиз қолмоқда.
Хайриятки, Қашқадарё вилояти ИИБ Касби тумани ҳокимлигидек кўриниб турган ҳақиқатдан кўз юммади. Борини тан олиб, айбдорни жазолади. Чори Кўчаровни лавозимидан озод қилди.
Изоҳ (0)