13 ёшли гондураслик қиз отасига АҚШ томонидан бошпана берилмагани сабаб ўз жонига қасд қилди

13 ёшли гондураслик муҳожир Хейди Гамес Гарсия отасига АҚШ томонидан бошпана берилмагани сабаб ўз жонига қасд қилди, деб хабар беради Forum Daily.

Қиз 23 июль куни дафн этилган, унинг отасига эса бир неча соатга муҳожирларни сақлаш марказидан чиқишга рухсат беришган.

Қизнинг холаси айтишича, Хейди тўрт йилдан буён отасини кўрмагани сабаб жуда тушкунликка тушиб қолган. Қизалоқ туғилганидан икки ой ўтиб онаси уларни ташлаб кетган ва Мануэл Гамес уни бир ўзи катта қилган. У Гондурасдаги ўзлари истиқомат қиладиган шаҳарда доим зўравонликлар содир бўлиб тургани сабаб қизини Америкага жўнатиб юборган. Бироқ эркакнинг ўзига муҳожирлар билан шуғулланиш маркази бошпана бермаган.

Гамес ҳар куни қизи билан телефон орқали гаплашган ва уч маротаба АҚШ ҳамда Мексика чегарасини кесиб ҳам ўтган. Ҳар сафар уни қўлга олишиб, қайта Гондурасга қайтариб юбораверишган.

1 июль куни АҚШ иммиграция хизмати Гамесни Техас яқинида қўлга олиб, қизи ўз жонига қасд қилмагунига қадар қўйиб юбормаган.