«Барселона» тарихидаги энг қиммат 5 трансфер ҳақида

Антуан Гризманни 120 миллион еврога сотиб олган «Барселона» сўнгги 10 йил ичида футболчилар трансфери учун 1 миллиард евродан ортиқ маблағ сарфлаган илк клубга айланди.

Ла Масия деб номланадиган дунёга машҳур академиясидан Месси, Хави, Вальдес, Пуйоль, Иньеста ва Пике каби футболчиларни етиштириб чиқарган «Барселона»нинг трансферлар учун космик пулларни сарфлаши кишини ҳайратга солиши табиий, албатта.

Аммо кўп нарса ўзгармоқда. Каталонияликлар «Манчестер Сити», «Реал» ва ПСЖ каби клублардан ортда қолмаслик учун ҳам кўпроқ маблағ сарфлашга мажбур бўлмоқда. Шунинг учун бўлса керак, айни дамда футбол клублари томонидан амалга оширилган энг қиммат 10 та трансфернинг учтаси «Барселона»га тегишли.

Қуйидаги «кўк-анорранглилар» тарихидаги энг қиммат 5 трансферни кўриб чиқамиз:

5. Френки де Йонг: «Аякс» — «Барселона», 67 миллион фунт (2019)

2018/19 йилги мавсумдаги ҳаракатлари сабаб Френки дарҳол кимсан «Барселона»дан таклиф олди ва унга «лаббай» деб жавоб берди. Каталонияликлар 22 ёшли иқтидор учун 67 миллион фунтнинг баҳридан ўтди.

Нидерландиялик футболчи қойилмақом иқтидорга эга. «Барселона» раҳбариятини де Йонгнинг ҳаммасидан ҳам ўйинни ўқий олиши ва бошқара олиш қобиляти ўзига қаратгани бежиз эмас. Агар у янги жамоасида ҳам ўсишдан тўхтамаса, албатта, «Камп Ноу»дагиларнинг ёқимтойига айланади.

4. Луис Суарес: «Ливерпуль» — «Барселона», 67 миллион фунт (2014)

Дунёнинг энг кучли ҳужумчиларидан бири Луис Суарес 2014 йил 67 миллион фунт эвазига «Ливерпуль»ни тарк этиб, «Барселона»га ўтганди. У клубга келгандан сўнг ҳам фақат юқори даражага чиқишда давом этди. Клубга келишдан аввал 4 ойлик дискваликация учраганига қарамай, Суарес жуда тез мослашиб кетишга эришди. Бунга исбот сифатида унинг Каталониядаиги илк мавсумида 25 та гол ура олганини кўрсатиш мумкин.

Ҳозирда 32 ёшни қоралаб қўйган Луис «Барселона»даги иккинчи мавсумида 40 та гол урди ва Испания «Олтин бутса»си эгасига айланди. Қайд этиш жоиз, 2009 йилдан бери Ла Лига «Олтин бутса» фақат Лео Месси ва Криштиану Роналдуга насиб қилаётган эди.

Луис ҳозирга қадар «Барселона» учун 247 та ўйин ўтказиб, 177 та гол урди  ва клуб тарихидаги энг яхши тўпурарларнинг кучли бешлигига кирди.

3. Усмон Дембеле: «Боруссия Д» — «Барслеона», 97 миллион фунт (2017)

222 миллион евро эвазига Неймарни ПСЖга сотган «Барселона» дарҳол бразилиялик футболчига ўринбосар топиш керак эди. Месси ва Суаресга янги партнёр сифатида эса «Боруссия Дортмунд» аъзоси Усмон Дембеле танланди. Каталониялик ёш француз учун 97 миллион фунтдан воз кечишига тўғри келди. Трансфер ҳақиқатан ҳам катта таваккалга асосланган эди. Аммо клуб раҳбарияти Дембелега ишонди ва ҳамон ишонишда давом этмоқда. Усмоннинг клубдаги саёҳатлари эса жароҳат ва ички қоидаларнинг бузилиши билан бошланди. Футболчи бир неча марта машғулотларга кечикиб келди. Шундай муаммоларга қарамай ҳеч ким Дембеленинг катта иқтидорга эга эканлигини инкор қила олмайди. Аммо унинг «Барселона»даги келажаги ҳамон сўроқ остида. Боиси у ҳали клубда асосий ўйинчига айланиши ҳам бошқа клубга ўтиб кетиши ҳам мумкин.

2. Антуан Гризманн: «Атлетико М» — «Барселона», 108 миллион фунт (2019)

Деярли икки йил давом этган «трансфер сериали» бахтли якун топди. Антуан Гризманн Мадрид клубини тарк этиб, «Барселона»га ўтди. Каталония клуби ЖЧ—2018 чемпиони учун «Атлетико М»га 108 миллион фунт тўлади. Дембеледан фарқли ўлароқ Гризманнинг айни дамдаги ҳолатини ижобий баҳолаш мумкин. Сабаби, Антуан 5 йил давомида «Атлетико Мадрид» сафида барқарор ўйин намойиш этди. У мадридликлар билан Европа Лигаси, УЕФА Суперкубоги каби совринларни қўлга киритди. Бундан ташқари 2 марта «Олтин тўп»га номзод сифатида кўрсатилди. Аммо ҳамма ҳам унинг «Камп Ноу»га ўтганидан мамнун эмас. Негаки, Гризманн 2018 йил ёзида «Барселона»га ўтишдан бош тортиб, кўплаб мухлисларнинг ғазабига учраганди. Энди эса унинг клубга мослашиб олиши учун маълум вақт талаб этилади.

1. Филиппе Коутиньо: «Ливерпуль» — «Барселона», 156 миллион фунт (2018)

«Барселона» тарихидаги энг қиммат трансфер 2018 йил амалга оширилган. Каталонияликлар Коутиньо учун «Ливерпуль»га 156 миллион фунт тўлагани айтилади. Филиппе бу орқали дунё футболи тарихидаги энг қиммат учинчи футболчига айланган.

Бразилиялик футболчининг трансфер сериали ҳам узоқ давом этган. Филиппени Каталонияда Андрес Иньестанинг ўринбосари сифатида кутишаётганди, ахир. Ва охир-оқибат Коутиньо «Барселона»га келди. Аммо футболчи учун 2018/19 йилги мавсум ҳақиқатда оғир ва мураккаб ўтди. У жамоа учун 45 та ўйин ўтказиб, 5 та гол урди, холос. Мухлислар ва клубдагилар ҳам ундан бундан натижани кутишмгани рост. Унинг клубга келганига 18 ойдан ошди ва кўпчилик Филиппенинг Каталонияда узоқ қолиб кетмаслигига ишонмоқда.