Ўзбекистон Давлат статистика қўмитаси 2019 йилнинг январь—июнь ойларида мамлакатдаги ўлим ҳолатларига қайси касалликлар сабаб бўлганини маълум қилди, бу ҳақда Sputnik хабар берди.
Қайд этилишича, 2019 йилнинг январь—июнь ойларида 75,8 мингта ўлим қайд этилган бўлиб, мос равишда 1000 аҳолига нисбатан ўлим коэффициенти 4,6 промиллени ташкил этди. Бу кўрсаткич 2018 йилнинг мос даврига нисбатан ўзгармаган бўлиб, 4,6 промилле бўлган.
Қўмита маълумотларига кўра, 2019 йилнинг январь—июнь ойларида қайд этилган ўлим ҳолатининг 62,1 фоизини қон айланиш тизими касалликлари, 9,5 фоизини ўсимталар, 5,3 фоизини овқат ҳазм қилиш аъзолари касалликлари, 4,5 фоизини нафас олиш аъзолари касалликлари, 5,4 фоизини бахтсиз ҳодиса, заҳарланиш ва жароҳатланишлар, 1,4 фоизини юқумли ва паразитар касалликлар ва 11,8 фоизини бошқа касалликлар ташкил этган.
Рўйхатга олинган 1 ёшгача вафот этган болалар сони 3,4 минг нафарни ташкил этиб, уларнинг 55,3 фоизи перинатал даврда юзага келадиган ҳолатлардан, 20,4 фоизи нафас олиш аъзолари касалликлари, 13,3 фоизи туғма аномалиялар, 2,2 фоизи бахтсиз ҳодиса, заҳарланиш ва жароҳатланишлар, 2,4 фоизи юқумли ва паразитар касалликлар, 0,8 фоизи овқат ҳазм қилиш аъзолари касалликлари ва 5,6 фоизи бошқа касалликлардан вафот этган.
Изоҳ (0)