20 июль куни соат 21:50 да Бухоро вилоятининг Шофиркон тумани ҳудудидан ўтган «Газли—Чимкент» магистрал газ қувурининг 76-километрида авария юз берди. Оқибатда, «Ўзтрансгаз»нинг расмий ахборотида таъкидланишича, алангаланиш юз берган.
Ҳозирги вақтда олов хизмат кўрсатувчи ходимлар ва тегишли хизматлар кучи билан қуршаб олинган. Ҳалок бўлганлар ва тан жароҳати олганлар йўқ. Хабарда қайд этилишича, авария-қайта тиклаш ишлари олиб борилмоқда. Давлат ёнғин хавфсизлиги хизматидан билдиришларича, ёнғинни ўчиришда тўртта ўт ўчириш экипажи қатнашмоқда.
«Gazeta.uz»нинг «Ўзтрансгаз»га асосланиб қўшимча қилишича, дастлабки маълумотларга кўра газ қувурининг пайванд чоки очилиб кетган, газ сизиб чиққан, кейинчалик металлар ишқаланишидан алангаланиш келиб чиққан.
Авария-қайта тиклаш ишлари вақтида газ узатиш тўхтатилган. Газ транспортировкасини 23 июлдан қайта тиклаш режалаштирилган. «Ўзтрансгаз»нинг алоҳида қайд этишича, магистрал газ қувури бўйлаб газ таъминотининг вақтинча тўхтатилиши истеъмолчиларга таъсир қилмайди.
Изоҳ (0)