Ўзбекистон бўйича юридик шахс мақомига эга бўлган корхона ва ташкилотларда ишловчиларнинг ўртача ойлик номинал ҳисобланган иш ҳақи 2019 йил январь—июнь ойларида 2,092 миллион сўмни ташкил этди. Давлат статистика қўмитасининг қайд этишича, бу 2018 йилнинг мос даврига нисбатан 30,1 фоизга кўп.
Таъкидлаш жоиз, «ўртача ойлик номинал ҳисобланган иш ҳақи» деганда қўмита иш ҳақига устама, мукофот, рағбатлантириш хусусиятига эга тўловлар, компенсация ва ишланмаган вақт учун ҳақ каби тўловларни ҳам киритган, шунингдек, унинг таркибида жисмоний шахслар даромад солиғи ва касаба уюшмасига тўловлар ҳам мавжуд.
Қўмитанинг қайд этишича, Ўзбекистон бўйича 2019 йил январь—июнь ойларида 2018 йилнинг мос даврига нисбатан иқтисодий фаолият турлари бўйича ўртача ойлик номинал ҳисобланган иш ҳақининг юқори ўсиш суръати соғлиқни сақлашда 37,2 фоиз, таълим соҳасида 35,3 фоиз, банк, суғурта, лизинг, кредит ва воситачилик фаолиятида 31,8 фоиз, саноатда 23,0 фоиз ва қурилишда 22,9 фоизни ташкил этган.
Ўртача ойлик номинал ҳисобланган иш ҳақи кўрсаткичини республика ҳудудлари бўйича кўрадиган бўлсак, яъни ўртача ойлик иш ҳақининг юқори миқдори Тошкент шаҳрида 2,971 миллион сўмни (республикадаги ўртача ойлик иш ҳақига нисбатан 142,0 фоиз), Навоий вилоятида 2,659 миллион сўмни (127,1 фоиз) ва Тошкент вилоятида 2,30 миллион сўмни (109,9 фоиз) ташкил этган бўлса, Самарқанд вилоятида 1,738 миллион сўмни (83,1 фоиз), Сурхондарё вилоятида 1,722 миллион сўмни (82,3 фоиз), Наманган вилоятида 1,72 миллион сўмни (82,2 фоиз) ташкил этиб, бошқа ҳудудларга нисбатан кам миқдорга эга бўлмоқда.
Изоҳ (0)