Ўзбекистон аҳолиси 33,5 миллион кишидан ошди

Ўзбекистон доимий аҳолиси сони 2019 йил 1 июль ҳолатига 33,5 миллион кишини ташкил этиб, 2019 йил бошидан 268,1 минг кишига ёки 0,8 фоизга ўсди.

Давлат статистика қўмитаси ахборотига кўра, шаҳар аҳолиси сони 16,9 миллион кишини (жами аҳоли сонидаги улуши 50,5 фоиз), қишлоқ аҳолиси сони 16,5 миллион кишини (49,5 фоиз) ташкил этди.

2019 йил 1 июль ҳолатига энг кўп аҳоли сони Самарқанд вилоятида — республика аҳолиси сонидаги улуши 11,4 фоиз; Фарғона вилоятида 11,1 фоиз, Қашқадарё вилоятида 9,7 фоиз, Андижон вилоятида эса 9,2 фоиз.

Дастлабки маълумотларга кўра, 2019 йил 1 июль ҳолатига кўра аҳолининг 30,5 фоизини меҳнатга лаёқатли ёшдан кичиклар, 59 фоизини меҳнатга лаёқатли ёшдагилар ва 10 фоизини катталар ташкил этмоқда.