Ташқи ишлар вазири Абдулазиз Комилов бошчилигидаги делегация Вашингтонда Ўзбекистоннинг инвестицион салоҳияти ва капитал бозори истиқболларига бағишланган тақдимот ўтказди. Бу ҳақда ТИВ матбуот хизмати маълум қилди.
Тақдимотда Абдулазиз Комилов ва Олий Мажлис Сенати раисининг биринчи ўринбосари Содиқ Сафоев мамлакатда амалга оширилаётган ислоҳотлар, ташқи сиёсатнинг устувор йўналишлари ва Ўзбекистон — АҚШ муносабатларининг истиқболлари тўғрисида батафсил маълумот берилди.
Тақдимот доирасида АҚШ президенти ёрдамчисининг ўринбосари Лиза Кертис, АҚШ Давлат котибининг Жанубий ва Марказий Осиё масалалари бўйича ёрдамчиси вазифасини бажарувчи Элис Уэлсс ҳамда АҚШ — Ўзбекистон савдо палатаси раиси Керолин Лемм сўзга чиқди.
Лиза Кертис Ўзбекистондаги ислоҳотлар ва ўзгаришлар минтақавий ҳамкорликни қайта тиклаганини таъкидлади. Марказий Осиё давлатлари раҳбарларининг иккинчи маслаҳат учрашувини жорий йил кузида Тошкент шаҳрида ўтказиш режаси мисол тариқасида келтирилди.
АҚШ маъмурияти вакили Вашингтон республикадаги иқтисодий ва суд-ҳуқуқ тизимидаги ўзгаришлар, жумладан, Ўзбекистоннинг интеллектуал мулк ҳимояси соҳасида Женева конвенцияларига қўшилганини маъқуллашини айтди. Оқ уй вакили мазкур қадам Ўзбекистон иқтисодиёти рақобатбардошлиги, бизнес ва инвестициялар учун жозибадорлигини оширишини қайд этди. Кўплаб хавф ва қийинчиликларга қарамай ислоҳотлардаги ҳар бир одим орқали Ўзбекистон «минтақавий иқтисодий куч» сифатидаги салоҳиятини тўлиқ рўёбга чиқаришга яқинлашаётганини эътироф қилди.
Изоҳ (0)