Давлат хавфсизлик хизмати Сурхондарё вилояти бошқармаси ходимлари томонидан ўтказилган тезкор тадбир давомида Хоразм вилоятининг Боғот туманида яшовчи Хурсанд Оллаберганов ва Матназар Ваисов 2 килограмм 789 грамм опий гиёҳванд моддасини Хоразм вилоятига олиб кетаётганида Денов шаҳрида ашёвий далиллар билан ушланди.
Аниқланишича, Хурсанд Оллаберганов ушбу гиёҳванд моддаларни Тожикистон ҳудудига ўтиб, маҳаллий фуқародан 5200 АҚШ долларига Ўзбекистонга ўтказиб бериш шарти билан сотиб олган ва келишилганидек, тожикистонлик фуқаро ушбу оғуни айланма йўллар орқали мамлакатга ўтказиб берган.
1983 йилда туғилган Хурсанд Оллаберганов ва 1977 йилда туғилган Матназар Ваисовнинг ҳар иккиси ҳам муқаддам гиёҳванд моддалар савдоси билан боғлиқ жиноятни содир этганликлари учун жиноий жавобгарликка тортилган.
Ҳозирда мазкур ҳолат юзасидан Давлат хавфсизлик хизмати Сурхондарё вилояти бошқармаси томонидан Жиноят Кодексининг 246-моддасининг 2-қисми ва 273-моддасининг 5-қисми билан жиноят иши қўзғатилиб, тергов ҳаракатлари олиб борилмоқда.
Изоҳ (0)