Қибрайлик Мирали Чориев ҳаракатчан, бир ишнинг бошини тутдими, охирига етмагунча қўймайдиган билимли, зеҳнли инсон бўлган. Турли соҳаларда самарали ишлаб ҳурмат-эътибор топди. Мирали акани билганлар Шарофат опанинг тарбиясини олганда, дея унинг шаънига илиқ гаплар айтишарди. Унинг оиладаги ўрни, фарзандининг камолига қараб бир ҳавас қилсалар, ишга, ғайратига, одамларга бўлган самимий муомаласи-ю, жамиятда тутган ўрнига яна бир ҳавас қиладилар. Бироқ, улар ортидаги масъулият, меҳнат ва машаққатлар унинг ёлғиз ўзигагина аён. У турмуш ўртоғи билан узоқ йиллар бирга аҳилликда турмуш кечиришди. Тўсатдан келган ўлим Мирали аканинг турмуш ўртоғидан бевақт айирди. Мусибатли кунларнинг юки оғир бўларкан. У сабрдан тўн кийиб, турмуш ўртоғига бўлган садоқати билан йилларни ўтказди. Шарофат она ўғли билан биргаликда уч нафар набирасининг кемтик қалбига малҳам бўлди. Аёли оламдан ўтганда кичик фарзанди жуда ёш эди.
Аёлининг вафотидан кейин уч маротаба инсултни бошидан ўтказган ва ногирон бўлиб қолган М.Чориев гапира олмаса-да, хонадонига ташриф буюрган бир гуруҳ ички ишлар органлари ходимларини кўриб, хурсандчилигидан кўзига ёш олди.
– Қўшним бу йил 61 ёшга тўлди. Касаллиги туфайли ногирон бўлиб қолди, – дейди тумандаги «Байтқўрғон» маҳалласида яшовчи Саида Исроилова. – Албатта, онаси Шарофат опа учун фарзандининг бахтсизлигини кўришдан оғир азоб йўқ. Аммо, ҳар доим давлатимизнинг эътиборини ҳис қилиб туради, маҳалла-кўй, ҳомий ташкилотлар доим хабар олиб туришибди. Биз маҳалла фаоллари Давлатимиз раҳбаридан ҳам, ушбу тадбирни уюштираётган Ички ишлар вазирлиги раҳбариятидан ҳамда Малака ошириш институти ходимларидан ҳам жуда миннатдормиз.
– Мамлакатимизда ногиронлиги бўлган шахсларнинг манфаатларини ҳимоя қилиш, уларни жамиятимизнинг тўлақонли аъзоси эканлигини қўллаб-қувватлаш мақсадида турли тадбирлар ўтказилмоқда, дейди Ички ишлар вазирлиги Малака ошириш институти бошлиғи, юридик фанлар доктори, профессор, полковник Нуриддин Нарматов. – Дарҳақиқат, Давлатимиз раҳбарининг ташаббуси билан ногиронлиги бўлган шахсларнинг тўлақонли ҳаёт кечириши учун зарур шароитларни яратиш, уларга тиббий-ижтимоий ёрдам бериш тизимини янада такомиллаштириш бўйича муҳим Фармон ва Қарорлар қабул қилинди. Биргина, «ногирон» сўзи ўрнига «ногиронлиги бўлган шахс» иборасини қўллаш белгилангани юртимизда инсон омилига бўлган юксак эътиборнинг натижасидир.
Институт профессор-ўқитувчилари томонидан ўтказилаётган «Менинг маҳалламда жиноят содир бўлмаслиги керак» мавзусидаги маърифий тадбирлар давомида ҳудудий ички ишлар органлари ходимлари ва кенг жамоатчилик вакиллари билан ҳамкорликда маҳаллаларда истиқомат қилаётган кам таъминланган, ногиронлиги бўлган фуқаролар, якка ёлғиз кекса авлод вакилларининг ҳолидан хабар олиняпти.
Ижтимоий ҳимояга муҳтож фуқаролар, кексалар ва ногиронларни қўллаб-қувватлаш, турмуш даражасини ошириш, уларни қийнаётган муаммоларни ҳал этиш, оғирини енгил қилиш, ҳаётдан рози бўлиб яшашига кўмаклашиш ҳар биримизнинг инсоний бурчимиздир.
– Пойтахтимизнинг Мирзо Улуғбек тумани «Аҳиллик» маҳалласида яшовчи Дмитрий Кузневский 3 ёшлигида менингит туфайли «кар-соқовлик»ни орттириб олган, – дейди биз билан суҳбатда унинг қўшниси Илмира Ўтаева.
Онасининг вафоти уни тушкунликка тушириб қўйди. Дмитрий ва унинг турмуш ўртоғи гапира ва эшита олмаса-да, эшигини тақиллатиб келган бир гуруҳ ички ишлар органлари ходимларини кўриб, хурсанд бўлишди.
Суҳбат жараёнида ушбу оила имо-ишора орқали ҳар доим давлатимизнинг эътиборини ҳис қилиб туришларини, маҳалла-кўй, ҳомий ташкилотлар доимо хабар олиб турганликларини тушунтиришга ҳаракат қилди.
– Маҳалламизда 3024 нафардан зиёд турли миллат вакиллари аҳил-иноқликда истиқомат қилиб келишмоқда, – дейди «Аҳиллик» маҳалласи 99-милиция таянч пункти профилактика инспектори, катта лейтенант Сардор Гаиназаров. – Ҳуқуқбузарлик ва жиноятчиликнинг олдини олиш мақсадида жойларда ўтказилаётган ушбу тарғибот-тушунтириш ишлари муҳим аҳамият касб этади. Ички ишлар вазирлиги Малака ошириш институтининг профессор-ўқитувчилари томонидан ўтказилган мазкур учрашув ҳам самарали бўлди. Фуқароларимиз ўзларини қизиқтирган саволларига тўлақонли жавоблар олди.
Шунингдек, бағрикенглик ва саховатпешалик қон-қонига сингиб кетган Институт жамоасининг меҳр-мурувватга муҳтож, боқувчисини йўқотган, имконияти чекланган Наманган шаҳри «Қадамжо» маҳалласида яшовчи, 1945 йилда туғилган Б.Боннабоев, Тошлоқ тумани «Фурқат» маҳалласи яшовчи, 1958 йилда М.Ризақулова, Наманган тумани «Кичик Тошбулоқ» маҳалласи яшовчи, кам таъминланган, якка-ёлғиз Д.Джалолиддиновлар каби ўнлаб оилаларнинг хонадонларига борилиб, ғамхўрлик кўрсатилгани эътирофга лойиқдир.
Зеро, бир инсоннинг кўнглини кўтариш, унинг қалбига хурсандчилик киритиш нақадар савобли, шу билан бу эзгу ишларни қилган кишининг кўнгли ҳам шод бўлгай.
Ўзбекистон Республикаси ИИВ Малака ошириш институти матбуот хизмати
Изоҳ (0)