Президентнинг «Ихтисослаштирилган ўқув-тарбия муассасалари фаолиятини тубдан такомиллаштириш тўғрисида»ги Қарорига мувофиқ Халқ таълими вазирлиги ҳузурида Сирдарё вилояти, Бахт шаҳрида Республика ўғил болалар ўқув-тарбия муассасаси ташкил этилиб, у Миллий гвардияга бириктирилган.
Миллий гвардия матбуот хизмати хабарига кўра, ушбу ўқув-тарбия муассасасида Қарор лойиҳаси бўйича вазифалар қисқа муддат ичида белгиланиб, Президент томонидан илгари сурилган 5 та муҳим ташаббус йўналишлари бўйича бир қатор ташкилотлар ҳамкорлигидаги ишлар амалда оширилди.
Хусусан, биринчи йўналиш бўйича ёшларда санъатга бўлган қизиқишни орттириш мақсадида Ўзбекистонда хизмат олиб бораётган таниқли актёр ва актрисалар билан турли хил ижодий учрашувлар ўтказилиши йўлга қўйилган. «Қувноқлар ва зукколар» жамоаларининг чиқишлари ҳамда концерт дастурлари, Ҳарбий-техник институти оркестри жамоаси ва «Алвон беретлар» бадиий ҳаваскорлик ансамбли ўз фаолиятини ушбу мактабга боғлаган ҳолда тарбияланувчилар учун махсус мусиқий дастурлар устида иш олиб бормоқда.
Иккинчи йўналиш ижроси бўйича эса ушбу муассасада тарбияланувчиларни жисмоний чиниқтириш, уларнинг спорт соҳасида қобилиятини намоён қилиш мақсадида спортнинг футбол, волейбол, стол тенниси, шаҳмат ва шашка турлари бўйича мусобақалар ташкиллаштирилиб, спорт тадбирларида фаол қатнашган ва ғолибликни қўлга киритган ёшлар муносиб тақдирланиб борилиши йўлга қўйилган.
Тўртинчи йўналишда белгилангандек ёшларнинг маънавиятини юксалтириш ҳамда улар ўртасида китобхонликни кенг тарғиб қилиш мақсадида Ҳарбий-техник институти профессор-ўқитувчилари томонидан давра суҳбатлари ва китоб мутоаласи бўйича маданий-маърифий тадбирлар ўтказилмоқда.
Республика ўғил болалар ўқув-тарбия муассасасида 5 та муҳим ташаббуснинг ҳар бир йўналиши бўйича махсус тўгараклар ташкил этилган бўлиб, тарбияланувчилар иқтидори ва қобилиятларига кўра гуруҳларга бириктирилган.
Миллий гвардия қўмондони генерал-полковник Б.Ташматов ва Сирдарё вилояти ҳокими Ғ.Мирзаевлар ўқув муассасасининг фаолияти билан яқиндан танишиш мақсадида тарбияланувчилар билан учрашув ўтказди.
Суҳбат давомида Миллий гвардия қўмондонлиги иқтидорли йигитларга келажакда ўзлари қизиққан касбий йўналишда ўқиш ва ишлаш имкониятига эга бўлишга кўмаклашишини, ҳеч бир тарбияланувчи эътибордан четда қолмаслигини билдирган.
Изоҳ (0)