Ливия фуқаросига турмушга чиққан ўзбекистонлик аёл икки фарзандига фуқаролик олиб беришда ёрдам сўраб Ўзбекистон Хотин-қизлар қўмитасига мурожаат қилди. Бу ҳақда қўмита раиси ўринбосари Гулнора Маъруфова маълум қилди, дея хабар бермоқда «Дарё» мухбири Мусулмонбек Иброҳимов.
Таъкидланишича, ливияликка турмушга чиққан аёл 2019 йил июлида фарзандларига фуқаролик олишда амалий ёрдам кўрсатишни сўраб, Ўзбекистон Хотин-қизлар қўмитасига келган.
«Ливия фуқаросига турмушга чиққан асли ўзбекистонлик аёл икки боласига Ўзбекистон фуқролигини олишда ёрдам ва маслаҳат сўраб, қўмитага мурожаат қилди. Аёлнинг айтишича, Ливияда вазият яхши эмас, у ерда ҳар куни отишма бўлмоқда. Фарзандлари тинч яшашини хоҳлаётгани учун кўмак беришимизни илтимос қилди», — деди Гулнора Маъруфова.
Қўмита вакили ўзбекистонлик аёл қандай қилиб Ливия фуқароси билан оила қургани ва у Ливиядан Ўзбекитонга қандай қайтиб келганига ойдинлик киритмади. Қайд этиш жоиз, аввалроқ Хитой фуқароларига турмушга чиққан ўзбекистонлик аёллар Ватанга қайтарилиши билан боғлиқ бир неча ҳолат юз берган эди.
Маълумот учун, 2019 йил апрелидан бери Ливия пойтахти Триполида қуролли тўқнашувлар давом этмоқда. Ливия миллий армияси қўмондони Халифа Хафтар БМТ томонидан Ливия ҳукумати сифатида тан олинган Миллий бирдамлик ҳукуматини ағдариб ташлаш учун Триполига бостириб киришга қарор қилган.
Изоҳ (0)