Мудофаа вазирининг ўринбосари генерал майор Азизбек Икрамов бошчилигидаги масъул мансабдор шахслардан иборат гуруҳ 9—12 июль кунлари Марказий ҳарбий округда жойлашган ҳарбий қисм ва муассаларда сайёр қабул ўтказди. Бу ҳақда вазирлик Ахборот ва оммавий коммуникациялар департаменти «Дарё»га маълум қилди.
Самарқанд, Каттақўрғон, Жиззах, Зарафшон, Навоий шаҳарлари ҳамда Учқудуқ туманида бўлиб ўтган қабуллар давомида жами 832 та мурожаат бўлди. Округлар кесимида таҳлил қилинадиган бўлса, Шарқий ҳарбий округда ўтказилган сайёр қабул давомида 694 та, Жануби-ғарбий махсус ҳарбий округда эса мурожаатлар сони 429 тани ташкил этган.
Қабуллар давомида Мудофаа вазирлиги марказий аппаратидан иборат ишчи гуруҳ баробарида округ қўмондонлиги масъул офицерлари, жойлардаги давлат ва жамоат ташкилотлари раҳбарлари ҳарбий хизматчилар ва уларнинг оила аъзолари ҳамда ҳарбий пенсионерларнинг мавжуд муаммолари, талаб, таклиф ва эҳтиёжлари ўрганилиб, уларга амалий кўмак бериш юзасидан иш олиб борилди.
Самарқанд шаҳрида ипотека кредити асосида уй-жойлар олиш муддатига аниқлик киритиб бериш масаласида мурожаатлар 15 фоиз (Жиззах вилоятида 20 фоиз), ҳарбийлар оила аъзоларининг касаллиги ҳамда оилада ёлғиз ўғиллиги туфайли хизмат жойини кўчириш масаласи 23 фоиз (Жиззах вилоятида 26 фоиз), муддатли ҳарбий хизматни ва сафарбарлик чақируви резерви хизматини ўтаб қайтган фуқароларни контракт бўйича ҳарбий хизматга чақириш масаласида 2 фоиз (Жиззах вилоятида 1,5 фоиз), ҳарбий пенсионерларнинг фарзандларига республика олий таълим муассасаларига ўқишга кириш учун имтиёзли тавсиянома бериш масаласи 1 фоиз (Жиззах вилоятида 1,5 фоиз), ҳарбий хизматчиларнинг оила аъзолари ва ҳарбий пенсионерларнинг даволаниш масаласи 1 фоиз (Жиззах вилоятида 5 фоиз), ҳарбий хизматчиларнинг оила аъзолари ва ҳарбий пенсионерларни ишга ҳамда уларнинг фарзандларини боғча ва мактабларга жойлаштириш масаласида 4 фоиз (Жиззах вилоятида 10 фоиз)ни ташкил этган.
Таъкидлаш керакки, Марказий ҳарбий округда оилавий муаммолар бўйича бирорта мурожаат бўлмаган.
Изоҳ (0)