Жорий йил 9 июль куни Bloomberg халқаро ахборот канали томонидан Санкт-Петербург шаҳрида ўтказилган Халқаро молия конгресси доирасида Ўзбекистон Марказий банки раиси интервьюси асосида «Жорий йилда Ўзбекистон қўшимча еврооблигациялар чиқариши мумкин» номидаги мақола чоп этилди. Бу ҳақда Марказий банк матбуот хизмати маълум қилди.
Интервью давомида жорий йилда тижорат банклари томонидан халқаро облигацияларни чиқарилиши мумкинлиги қайд этилган.
Марказий банк ушбу билдирилган фикрларни талқин этиш ва иқтибос келтиришда суверен ва корпоратив халқаро облигацияларнинг фарқига эътибор қаратиш лозимлигини таъкидлайди.
Ушбу масалани оммавий ахборот воситалари ва халқаро инвесторлар томонидан нотўғри талқин қилинишини олдини олиш мақсадида Молия вазирлиги 2019 йилда Ўзбекистон Республикасининг суверен облигацияларини қўшимча чиқарилиши режалаштирилмаётганлигини расман қайд этади.
Ўзбекистон Республикасининг келгусида муомалага чиқариладиган суверен халқаро облигацияларининг муддати ва ҳажмлари мамлакат ҳукумати томонидан макроиқтисодий сиёсатнинг устувор йўналишлари ҳамда жаҳон капитал бозорларида шаклланаётган ҳолатдан келиб чиқиб белгиланади.
Изоҳ (0)