Андижон вилоятининг Қўрғонтепа туманида яшовчи нуронийлар Жалолиддин Йўлчибоев, Кимсанбой Маматқўзиев ҳамда Тожимуҳаммад Орзибоевлар Андижондан Хивага велосипедда бориб қайтди. Бу ҳақда «Дарё» мухбири хабар бермоқда.
Фахрийларнинг ижтимоий фаолиятини қўллаб-қувватлаш «Нуроний» жамғармаси туман бўлими раиси Равшанбек Мамажоновнинг маълум қилишича, икки минг километрдан зиёд йўлни босиб Хива шаҳрига етиб боришни мақсад қилган бир гуруҳ нуронийлар бундан бир ой аввал Қўрғонтепадан велосипедда йўлга чиққан. Икки ҳафтада манзилга етиб борган отахонлар икки кун қадимий шаҳарда бўлиб ортга қайтган ва 10 июль куни ўз уйларига эсон-омон етиб келган.
— Салкам бир ой давом этган саёҳатимизнинг ўзига хос синовлари биз кекса авлод вакилларини турли чиғириқдан ўтказди, — дейди Жалолиддин Йўлчибоев. – Аслида биз олти киши йўлга чиққан эдик. Афсуски, Сирдарё вилоятига етганимизда гуруҳимизнинг энг ёши улуғи, етмиш беш ёшни қаршилаган Мақсудхон Аъзамхоновнинг саломатлиги бироз безовта қилди ва у шу сабаб сафарни ўша ерда тўхтатишга мажбур бўлди. Чунки, кун сайин ҳароратнинг ортиб бориши, айниқса дашт ва саҳролар орасидаги ҳаракат оқсоқолни бироз қийнаб қўйди. Абдулаҳад Турдиев ва Умрзоқ Ҳайдаровларнинг «тулпорлар»и эса Самарқанд шаҳрига кириб келганимизда сафарга дош беролмади. Улар ҳам велосипедлари ишдан чиққани боис ортга қайтишга мажбур бўлди. Шундай қилиб маррага уч оқсоқол – Жалолиддин Йўлчибоев, Кимсанбой Маматқўзиев ҳамда Тожимуҳаммад Орзибоевлар соғ-саломат етиб келди.
— Қадим Хоразмнинг тарихий ва фусункор шаҳри Хива бизни қучоқ очиб қаршилади, — дейди Кимсанбой ота Маматқўзиев. — Шунча йўлни велосипедда босиб келганимизга баъзида ўзимиз ҳам қойил қоляпмиз. Негаки, мезбонлар бизнинг ҳикояларимиздан, сафар таассуротларимиздан лолу-ҳайрон. Рост-да, ўзи ҳам бир умрга унутилмайдиган саёҳат бўлди. Шу баҳона юртимизнинг батакрор манзаралари, тоғу-тошлар, қир-адирлар, чўлу-биёбонлар, гуллаган шаҳар ва қишлоқларни кўриб кўзимиз қувнади.
— Ёзги ҳароратнинг ортиб бориши, техник имкониятлар бизнинг режамизни ўзгартириб юборди, — дейди Тожимуҳаммад ота Орзибоев. – Шу сабаб ортимизга тезроқ қайтдик. Режадаги жанубий йўналиш кейинги сафар забт этилади. Ўшанда шимолий йўналишимиз ҳам Қозоғистоннинг Остона (Нурсултон) шаҳригача боради.
Изоҳ (0)