Ўзбекистонда 2019 йилнинг ўтган даврида эркаклар ва аёллар ўртасидаги суиқасд кўрсаткичлари таҳлил қилинганда эркаклар билан боғлиқ ҳолат 57,3 фоизни, аёллар билан боғлиқ ҳолат 42,7 фоизни ташкил этди. Бу ҳақда Ахборот ва оммавий коммуникациялар агентлигида 11 июль куни ўтказилган «Оиладаги зўравонлик масалалари, турли вазиятлар таҳлили ва бу борада олиб борилаётган чора-тадбирлар» мавзусидаги брифингда маълум қилинди.
«Ҳозирги вақтда ўз жонига қасд қилиш дунё миқёсида жамиятнинг глобал муаммосига айланиб қолди. Жаҳон соғлиқни сақлаш ташкилотининг маълумотига кўра, ҳар йили 4—5 миллион нафар инсон ўз жонига қасд қилади. Европа мамлакатлари бу борада олдинги ўринларда». — деган брифингда сўзга чиққан Хотин-қизлар қўмитаси раиси Элмира Боситхонова.
Таъкидланишича, суиқасднинг энг юқори кўрсаткичлари сўнгги йилларда ривожланган мамлакатларда қайд этилмоқда. Масалан, ҳар 100 минг кишига — Литвада 68,1 та ҳолат, Беларусда 63, Россияда 58, АҚШда 52, Шри - Ланкада 44, Украинада 40 та ҳолат тўғри келади.
«Ўзбекистонда эса ўз жонига қасд қилиш бўйича йилига ҳар 100 минг кишига 5,2 та ҳолат тўғри келмоқда, лекин шу кўрсаткич ҳам биз учун кўп», — деган Боситхонова.
«Мен фоиз кўрсаткичларида айтиб ўтдим, буни аҳоли сонига тақсимлаб ҳисоб-китоб қилса, аниқ рақамлар келиб чиқади, — деган Боситхонова. — Ўзбекистон аҳолиси 33 миллион эканини инобатга олсак ва фоизлар кесимида чамаласак, мамлакатимизда 700 дан ортиқ эркак ҳамда 600 га яқин аёл суиқасд қилаётгани маълум бўлади».
Шунингдек, Президент қарорига мувофиқ, жойларда зўрлик ишлатишдан жабр кўрган шахсларни реабилитация қилиш ва мослаштириш билан шуғулланадиган 165 та марказ фаолияти йўлга қўйилгани маълум қилинган. Ҳозирга қадар ушбу марказларга 5 минг 468 нафар хотин-қиз мурожаат этгани қайд этилди.
Изоҳ (0)