Ўзбекистоннинг Франциядаги элчихонаси ташаббуси билан Парижда Наманган вилоятидаги йирик текстиль корхоналарининг тақдимоти ўтказилди. Бу ҳақда «Халқ сўзи» хабар бермоқда.
Элчихона биносида ташкил этилган тадбирда вилоятдаги уч корхона — «Истиқлол текстиль дизайн», «Текстиль либос» масъулияти чекланган жамиятлари ҳамда «Чуст текстиль» хусусий корхонаси ўз маҳсулотларини намойиш қилди.
Тақдимот аввалида бугунги кунда Наманган вилояти брендига айланган текстиль саноатининг салоҳияти хусусида батафсил маълумот берилди.
Франциянинг бир қатор савдо ва ишлаб чиқариш компаниялари, Париж мода академияси вакиллари кўргазмага қўйилган маҳсулотлар билан яқиндан танишди. Уларни, айниқса, Наманганда тикилаётган эркаклар костюм-шимлари ва бошқа трикотаж маҳсулотлари бежиримлиги билан қизиқтириб қўйди.
— Франция—Наманган иқтисодий муносабатлари ўрнатилганига кўп бўлгани йўқ, шунга қарамай жорий йилнинг ўтган даврида 580 минг АҚШ доллари атрофида товар айланмаси амалга оширилди, — дейди вилоят инвестициялар ва савдо бошқармаси бош мутахассиси Асрорбек Ҳайдаров. — Мазкур давлатга биринчилар қаторида экспорт амалиётини йўлга қўйган «Чуст текстиль» хусусий корхонаси ўтган ойда 105,4 минг доллар қийматдаги трикотаж маҳсулотларини ўз ҳамкорларига юборди. Чустлик трикотажчилар йил охирига қадар бу кўрсаткични 600 минг долларга етказиш бўйича шартнома имзолаган.
Тақдимот жараёнида Франция компаниялари Наманган текстиль корхоналари билан савдо-иқтисодий алоқаларини янада кенгайтириш юзасидан таклифларини билдирди.
Изоҳ (0)