7 июль, якшанба куни Тайлоқ туман Солиқ инспекцияси ходими, 1999 йилда туғилган Давлат Нормаматов уйдан ишга кетяпман деб чиқиб кетган ва уйига келганидан сўнг соғлиги оғирлашиб, юрак хуружидан вафот этган. Воқеа содир бўлган куни Давлат Нормаматов бир нечта ўртоқлари билан тумандаги Элпок қишлоғида жойлашган ошхонада овқатланиб, сўнг «Дарғом» каналида чўмилган.
Мазкур ҳолат юзасидан «Дарё» мухбири Фарҳод Норбўтаев журналистик суриштирув олиб борди.
Маълум бўлишича, воқеа содир бўлган куни эрталаб соат 8:30 дан 10:30 гача Давлат Нормаматов, туман солиқ инспекциясининг яна бир ходими Шаҳбоз Ҳамидов билан бирганликда ўзининг банкда ишловчи таниши билан Нурафшон маҳалласига пенсия тарқатишга борган. Аниқроғи, пенсия олаётган нафақахўрлардан солиқ тўловларини ундиришга борган. Пенсия тарқатиб бўлганидан сўнг тумандаги Элпок қишлоғидан оқиб ўтувчи «Дарғом» каналига чўмилишга борган. Чўмилишдан аввал «Дарғом» канали ёнида жойлашган ошхонада тушлик қилган.
– 1999 йилда туғилган, тумандаги Найман қишлоғида яшовчи Давлат Нормаматов туман Солиқ инспекциясига 2018 йилнинг 15 октябрида қоровул вазифасида ишга қабул қилинган, — дейди Тайлоқ туман Солиқ инспекцияси бошлиғи Шуҳрат Шарипов. – Ўша куни мен ҳокимиятда йиғилишда эдим. Йиғилишдан сўнг туман Ички ишлар бўлимидан қўнғироқ қилиб солиқ инспекцияси ходими ўлганлиги тўғрисида хабар қилишди.
Суриштирув давомида маълум бўлишича, Давлат Нормаматов ва унинг ўртоқлари соат тахминан 13:54 атрофида чўмилишдан қайтиб келган. У ердан келганидан сўнг уйига кетган.
– Бизда қоровулар ҳар 3 кунда навбатчиликка туради. Давлат Нормаматов 2019 йилнинг 5 июль куни навбатчиликка келиб, 6 июль куни навбатчиликни топшириб кетган. Шанба ва якшанба куни ишга келмаган, — дейди Шуҳрат Шарипов.
Чўмилишдан сўнг уйига борган Давлат Нормаматовнинг саломатлиги ёмонлашган. Дастлаб уйида беморнинг томирлари тортишиб, тутқаноқ берган. Сўнг худди шундай ҳолат шифохонага олиб кетилаётганда йўлда ҳам такрорланган. Тайлоқ туман тиббиёт бирлашмаси реанимация бўлими реанимотологлари Номоз Суяров ва Бобир Бозоровларнинг таъкидлашича, соат 16:40 атрофида бемор шифохонага оғир аҳволда олиб келинган.
– Бемор қабулхонага келганида аҳволи оғир эди. Уни зудилк билан текшириб, ўткир юрак етишмовчилиги билан оғринганлиги аниқланди. Беморнинг нафас олиши қийинлашганлиги боис сунъий нафас ҳам берилди. Аммо қилинган муолажаларимизнинг фойдаси бўлмади, — дейди реанимотолог Номоз Суяров.
Тайлоқ туман Солиқ инспекцияси бошлиғи Шуҳрат Шариповнинг айтишича, якшанба куни иш куни ҳисобланмайди. Хўш, якшанба куни дам олиш бўлса, унда нега дам олиш куни Нурафшон маҳалласига пенсия тарқатилаётган вақтда солиқчилар борган деган савол бизни қизиқтирмоқда.
Ҳозирда мазкур ҳолат юзасидан туман прокуратураси томонидан дастлабки суриштирув ишлари олиб борилмоқда.
Изоҳ (0)