7-iyul, yakshanba kuni Tayloq tuman Soliq inspeksiyasi xodimi, 1999-yilda tug‘ilgan Davlat Normamatov uydan ishga ketyapman deb chiqib ketgan va uyiga kelganidan so‘ng sog‘ligi og‘irlashib, yurak xurujidan vafot etgan. Voqea sodir bo‘lgan kuni Davlat Normamatov bir nechta o‘rtoqlari bilan tumandagi Elpok qishlog‘ida joylashgan oshxonada ovqatlanib, so‘ng “Darg‘om” kanalida cho‘milgan.
Mazkur holat yuzasidan “Daryo” muxbiri Farhod Norbo‘tayev jurnalistik surishtiruv olib bordi.
Ma’lum bo‘lishicha, voqea sodir bo‘lgan kuni ertalab soat 8:30 dan 10:30 gacha Davlat Normamatov, tuman soliq inspeksiyasining yana bir xodimi Shahboz Hamidov bilan birganlikda o‘zining bankda ishlovchi tanishi bilan Nurafshon mahallasiga pensiya tarqatishga borgan. Aniqrog‘i, pensiya olayotgan nafaqaxo‘rlardan soliq to‘lovlarini undirishga borgan. Pensiya tarqatib bo‘lganidan so‘ng tumandagi Elpok qishlog‘idan oqib o‘tuvchi “Darg‘om” kanaliga cho‘milishga borgan. Cho‘milishdan avval “Darg‘om” kanali yonida joylashgan oshxonada tushlik qilgan.
– 1999-yilda tug‘ilgan, tumandagi Nayman qishlog‘ida yashovchi Davlat Normamatov tuman Soliq inspeksiyasiga 2018-yilning 15-oktabrida qorovul vazifasida ishga qabul qilingan, — deydi Tayloq tuman Soliq inspeksiyasi boshlig‘i Shuhrat Sharipov. – O‘sha kuni men hokimiyatda yig‘ilishda edim. Yig‘ilishdan so‘ng tuman Ichki ishlar bo‘limidan qo‘ng‘iroq qilib soliq inspeksiyasi xodimi o‘lganligi to‘g‘risida xabar qilishdi.
Surishtiruv davomida ma’lum bo‘lishicha, Davlat Normamatov va uning o‘rtoqlari soat taxminan 13:54 atrofida cho‘milishdan qaytib kelgan. U yerdan kelganidan so‘ng uyiga ketgan.
– Bizda qorovular har 3 kunda navbatchilikka turadi. Davlat Normamatov 2019-yilning 5-iyul kuni navbatchilikka kelib, 6 iyul kuni navbatchilikni topshirib ketgan. Shanba va yakshanba kuni ishga kelmagan, — deydi Shuhrat Sharipov.
Cho‘milishdan so‘ng uyiga borgan Davlat Normamatovning salomatligi yomonlashgan. Dastlab uyida bemorning tomirlari tortishib, tutqanoq bergan. So‘ng xuddi shunday holat shifoxonaga olib ketilayotganda yo‘lda ham takrorlangan. Tayloq tuman tibbiyot birlashmasi reanimatsiya bo‘limi reanimotologlari Nomoz Suyarov va Bobir Bozorovlarning ta’kidlashicha, soat 16:40 atrofida bemor shifoxonaga og‘ir ahvolda olib kelingan.
– Bemor qabulxonaga kelganida ahvoli og‘ir edi. Uni zudilk bilan tekshirib, o‘tkir yurak yetishmovchiligi bilan og‘ringanligi aniqlandi. Bemorning nafas olishi qiyinlashganligi bois sun’iy nafas ham berildi. Ammo qilingan muolajalarimizning foydasi bo‘lmadi, — deydi reanimotolog Nomoz Suyarov.
Tayloq tuman Soliq inspeksiyasi boshlig‘i Shuhrat Sharipovning aytishicha, yakshanba kuni ish kuni hisoblanmaydi. Xo‘sh, yakshanba kuni dam olish bo‘lsa, unda nega dam olish kuni Nurafshon mahallasiga pensiya tarqatilayotgan vaqtda soliqchilar borgan degan savol bizni qiziqtirmoqda.
Hozirda mazkur holat yuzasidan tuman prokuraturasi tomonidan dastlabki surishtiruv ishlari olib borilmoqda.
Izoh (0)