Тошкент шаҳрида дарахтларнинг ноқонуний кесилиши ҳолатлари бўйича бир нечта жиноят ишлари қўзғатилган. Бу ҳақда Экология ва атроф-муҳитни муҳофаза қилиш давлат қўмитаси вакилларининг журналистлар билан бўлиб ўтган очиқ мулоқотида маълум қилинди, дея хабар бермоқда «Дарё» мухбири Мусулмонбек Иброҳимов.
Давлат қўмитаси раиси ўринбосари Ўктам Ўтаев Жиноят кодексинининг 198-моддаси — экинзор, ўрмон ёки бошқа дов-дарахтларга шикаст етказиш ёки уларни нобуд қилиш ҳолатлари бўйича очилган жиноятлар ҳақида қисқача маълумот берди.
Давлат қўмитаси вакилининг маълум қилишича,
- Мирзо Улуғбек туманида «Янги замон» компанияси томонидан «Авайхон» маҳалласида 786,4 миллион сўмлик дарахтларнинг ноқонуний кесилиши;
- Чилонзор туманида Олимпия захиралари мактаб-интернетида 159,6 миллион сўмлик дарахтларнинг ноқонуний кесилиши;
- Яшнабод тумани Тузел-2 қўрғони «Ватандош» маҳалласида 142,7 миллион сўмлик дарахтларнинг ноқонуний кесилиши ҳолатлари бўйича жиноят ишлари қўзғатилган.
Маълумот учун, Жиноят кодексининг 198-моддаси иккинчи қисми (ўрмон ёки бошқа дов-дарахтларни қонунга хилоф равишда кесиш кўп миқдорда зарар етказилишига сабаб бўлса) бўйича айбдор деб топилган шахслар энг кам ойлик иш ҳақининг 50 баравари (10 136 500 сўм)дан 75 баравари (15 204 750 сўм)гача миқдорда жарима ёки 240 соатдан 300 соатгача мажбурий жамоат ишлари ёки 1 йилдан 2 йилгача ахлоқ тузатиш ишлари ёки 1 йилдан 3 йилгача озодликни чеклаш ёки 3 йилгача озодликдан маҳрум қилиш билан жазоланади.
Айни вақтда, худди шу модданинг учинчи қисми (экинзор, ўрмон ёки бошқа дов-дарахтларга қасддан шикаст етказиш, уларни пайҳон қилиш, нобуд қилиш кўп миқдорда зарар етказилишига сабаб бўлса) билан айбдор деб топилган шахслар энг кам ойлик иш ҳақининг 75 бараваридан 100 баравари (20 273 000 сўм)гача миқдорда жарима ёки 300 соатдан 360 соатгача мажбурий жамоат ишлари ёки 2 йилдан 3 йилгача ахлоқ тузатиш ишлари ёхуд 1 йилдан 3 йилгача озодликни чеклаш ёки 3 йилгача озодликдан маҳрум қилиш билан жазоланади.
Изоҳ (0)