Фарғона вилояти Қўштепа тумани Ўқчи қишлоғидаги 27-умумтаълим мактаби 1987 йили қурилиб, фойдаланишга топширилган. 32 йилда бир марта 30 миллион сўм эвазига жорий таъмирланган. Қуввати 620 ўринли, ҳозирда негадир 720 ўқувчига мўлжалланган деб юритилаётган масканда айни пайтда 987 бола таълим олади.
Мактабда айни пайтда 396 нафар бошланғич синф ўқувчиси бор. Бироқ бошланғич синфлар биноси 120 ўринга мўлжалланган. Синф хоналари етишмаётгани учун тўртинчи синфлар юқори синфлар биносида ўқмоқда.
Мактаб директорини нима қийнаяпти?
— Туман, вилоят халқ таълими тизимида ишлаганман. Шароити оғир бўлгани учун шу мактабга жўнатишди. Билсам, аҳвол мен ўйлагандан ҳам оғирроқ экан. Орада кетиб қолдим, яна қайтаришди. Ахир ҳаммамиз қочиб кетаверсак, аҳволни кимдир ўнглаши ҳам керак-ку!Айрим фанлар бўйича етишмаётган ўқитувчилар ўрнига яхши мутахассисларни таклиф қилдим. Оз вақт ишлаб, шароитдан нолиб, кетиб қолишди. Ҳозир ҳам инглиз ва рус тили ўқитувчилари етишмайди. Ҳеч ким бу мактабга келишни хоҳламаяпти. Ўқувчи ва ўқитувчиларга шароит яратиш мақсадида тегишли идораларга бир неча бор мурожаат этдим. Уни навбатдаги ўқув йили учун мўлжалланган инвестиция дастурига киритиш ҳақида туман халқ таълими бўлимига расмий хат билан чиқдим. Аммо шундай аҳволдаги мактаб бу йил ҳам дастурга кирмай қолибди.
Ички имкониятлардан келиб чиқиб, умуман яроқсиз бўлиб кетган эшикларни алмаштирдик, айримларини ямадик, тутқичлар ўрнатдик, улар ҳам ҳозир узилиб тушди. Мактаб орқасидаги ташландиқ ерда спорт майдони қилдик. Ромларнинг ойналарини артишнинг иложи йўқ, чунки тозалаётганда ҳаддан ташқари катта ромлар пастга қулаб, ойналари чилпарчин бўлди, яхшиямки, ҳеч кимга зиён етмади. Ҳавонинг иссиқ кунларида айрим синфларда ўқитувчилар деразаларни очишга қўрқади, чунки чириб, узилиб тушишга келиб қолган. Полларнинг аҳволини айтмаса ҳам бўлади. Назаримда, шароити бизникидан оғирроқ мактаб вилоятда ҳам бўлмаса керак. Нима учун дастурдан тушиб қолгани мени қийнаяпти, — дейди мактаб директори Зоиржон Тожибоев.
Мактаб раҳбарлари ҳамроҳлигида синф хоналарини кўздан кечирдик. Рус тили, биология хоналаридаги линолеумлар йиртилиб кетган. Қолган синфларларда ҳам аҳвол бундан яхши эмас.
Информатика хонасида ёш ўқитувчи Қобилжон Солижоновни бир йигит билан йиртилиб кетган проекторни скотчлаётган пайтда учратдик. Стол устида биттагина компьютер турибди. У ҳам директорнинг ҳаракати билан шу йилнинг январида келтирилибди. Унгача ўқувчилар компьютерни фақат тасаввур қиларкан.
— Тўғриси, шу йил январигача мактабимизда компьютер бўлмаган. Беш ойдан буён амалий машғулотларни битта технология ёрдамида фақат қизиққан болалар билан тасвирни мана бу экранга тушириб олиб, кўрсатиб тушунтираман. Биз ҳам бошқалар каби компьютер синфларимиз бўлишини истаймиз, — деди Қобилжон Солижонов.
Мактабларда электрон доскалардан фойдаланилаётган бир пайтда бу ерда чет тили хонасидаги доска икки жойидан ёрилиб ётибди, шкафлар ҳам алмисоқдан қолган.
Лабораторияда амалий машғулот учун бирор бир жиҳоз йўқ. Улар яроқсиз ҳолга келиб қолганлиги учун далолатнома билан ҳисобдан чиқариб юборилган экан. Лаборант Ферузахон Қўчқорованинг айтишича, амалий машғулотларга тажриба воситаларини қўшни 20-умумтаълим мактабидан ойда бир марта олиб келиб туришаркан. Бу аҳволда болалар кимёдан қандай кўникма олади? Биология фани хонаси деярли жиҳозланмаган, кўргазмали воситалар йўқ, лаборатория эса бўм-бўш.
Биология фани ўқитувчиси Ҳилолахон Аҳмаджонова таътилдан олдин бериладиган ойлик маошидан пул тўплаб, хонани бир амаллаб янги ўқув йили учун таъмирлаб олишини айтди.
Тадбирлар ўтказиладиган залнинг қаттиқроқ тегсангиз синиб тушадиган эшиги устма-уст бўёқ қилинганига қарамай, чириб кетган.
Спорт залидаги аҳвол ҳам жуда ачинарли. Бино атрофидаги уч гектардан зиёд ер қақраб ётибди.
— Мана шу майдон ташландиқ бўлиб ётганди. Текислаб, спорт майдонига ўхшатиб олгунимизча эркак ўқитувчиларимиз қаттиқ меҳнат қилди, — дейди директор.
Таълим сифати пастлигининг сабаби нимада?
Мактабда кейинги ўн йилда директор етти марта, катта синфларда директорнинг илмий ишлар бўйича ўринбосари тўрт марта, бошланғич синфларда уч марта, маънавий-маърифий ишлар бўйича ўринбосар тўрт марта алмаштирилди. Раҳбарларнинг қўнимсизлиги педагогик жамоани кун ўцинга ишлашга ўргатиб қўйган. Мактабда икки нафар биринчи, 17 нафар иккинчи тоифа, 35 нафар мутахассис, 4 нафар тугалланмаган олий, 3 нафар ўрта махсус маълумотли ўқитувчилар меҳнат қилади.Мактаб олимпиада ва билимлар беллашувлари натижасига кўра рейтингда 39-ўринни эгаллаб турибди. Кейинги ўн йилда мактаб ўқувчиларининг атиги ўн нафари олий ўқув юртларида ўқиган.
Раҳбарлар нима дейди?
— Таълим муассасида бўлиб, вазиятни ўргандим. Ҳақиқатан ҳам аҳвол аянчли. Агар дастурга киритиш навбатга ташланган бўлса, туман ҳокими билан маслаҳатлашиб, имкон қадар зарур ёрдамни беришга ҳаракат қиламиз, — дейди 2-сектор раҳбари, туман прокурори Мадаминбек Шомуродов.— Ҳақиқатан ҳам бу даргоҳ капитал таъмирга жуда муҳтож. Шунинг учун 2019–2028 йилларда инвестиция дастурига киритилиши таклиф этилаётган мактаблар қаторида бу муассасани 2020 йилда капитал таъмирлашга тавсия қилганмиз. Нима учун дастурдан тушиб қолганини билмайман, — дейди туман халқ таълими бўлими мудири Орифжон Деҳқонов.
Таълим тизимига, мактабга давлат миқёсида жиддий эътибор қаратилаётган бир пайтда, шу даражада аянчли ҳолга келиб қолган муассаса бўлса? Аҳвол бу ерда таълим-тарбия олаётган болалар, уларга сабоқ бераётган ўқитувчилар кайфиятига қандай таъсир кўрсатади? Нега мактаб мукаммал таъмирга муҳтож бўла туриб, мутасаддилар бирор чора кўрмаяпти? Мактабни мукаммал таъмирлаш бўйича давлат дастурига киритиш учун нима қилиш керак?
Саволларимизга мактабни 32 йилдан бери мукаммал таъмирлаш учун дастурга киритмаётган Халқ таълими вазирлиги мутасаддиларидан жавоб кутамиз.
Изоҳ (0)